Брюссельде Еуропалық Одақтың шұғыл саммиті жұмысын бастайды

АСТАНА.KAZINFORM - Бүгін Еуропа астанасындағы кезектен тыс кездесуге Еуропалық Одаққа мүше елдердің 27 көшбасшысы жиналды. Саммит АҚШ президенті Дональд Трамптың Ресей президенті Владимир Путинмен келіссөздерді бастау туралы шешіміне жауап ретінде шақырылды. 

Еуропа астанасындағы жағдайдың қалай өрбитіндігі Kazinform тілшісінің бақылауында.

- Бұл мағынасыз соғысты тоқтататын кез келді. Егер соғысты тоқтатқыңыз келсе, екі тараппен де сөйлесуіңіз керек, - деді Д.Трамп осы аптада Конгреске.

Ақ үй Киевке әскери көмек көрсетуді уақытша тоқтатты және бұл шешімнің ел үшін қиын сәтте салдары ауыр болуы мүмкін.

- Біздің одақтасымыз АҚШ бұл соғыстағы ұстанымын өзгертті, Украинаға қолдауын азайтты және одан әрі не болатынына күмән келтірді. Мен АҚШ біздің жағымызда болады деп сенгім келеді, бірақ біз бұлай болмайтынына дайын болуымыз керек, - деді Франция президенті Эмманюэль Макрон теледидардан сөйлеген сөзінде.

Бейсенбі күні бас қосқан 27 көшбасшы Украинаны ұжымдық қолдауда бірлік пен сенімділікті көрсетуге тырысады және ЕО қандай қауіпсіздік кепілдіктерін бере алады, қанша қосымша ақша бөлуге дайын және АҚШ-тың орнына қажетін өтеу үшін қаншалықты алысқа бара алады деген сияқты кейбір өзекті сұрақтарға жауап береді.

Сонымен қатар, мүмкін келіссөздер үшін арнайы өкіл тағайындау туралы мәселе талқыланады.

Сондай-ақ, Украина президенті В.Зеленскийдің өзі де қатысуы мүмкін.

Алайда, Еуропалық Одақтың өзіндегі саммиттің күн тәртібімен бәрі келісе бермейді. Венгрия президенті В.Орбан Д.Трамптың бейбітшілікке жету жолындағы күш-жігеріне нұқсан келтіруі мүмкін кез келген жаңа бастаманы бұзатынын айтып қорқытты. Венгрия басшысы «күш қолдану арқылы бейбітшілікке жету» тәсіліне қарсы, өйткені бұл Украинаға одан әрі әскери көмек көрсетуді білдіреді.

- Президент Дональд Трамп тұсында Еуропаның басым бөлігі мен АҚШ арасында стратегиялық - трансатлантикалық алауыздық бар, - деді Орбан саммит алдында.

Сонымен бірге, Венгрия лагеріне қосылу арқылы Словакия да соғысқа қарсы шығатынын білдірді.

Бейсенбі күнгі саммитте Урсула фон дер Ляйеннің 800 миллиард еуроға дейін қосымша инвестиция жұмылдыру туралы соңғы ұсынысы бойынша қорғаныс шығындары да қарастырылады.

Осыған дейін Макрон АҚШ-тың Еуропаға қатысты кез келген баж салығына әрекет етуге дайын екендігін айтқан болатын.