Брюссельде Испаниядағы қайғылы оқиғаларға байланысты ЕО тулары түсіріледі

БРЮССЕЛЬ. KAZINFORM – Испаниядағы су тасқынынан қаза тапқандарды аза тұту рәсіміне байланысты бүгін Еуроодақтың негізгі ғимараттары – Еурокомиссия, Еуропалық кеңес, Еуропарламенттің үстіндегі Еуроодақтың тулары жартылай түсіріледі, деп хабарлайды Kazinform агенттігінің меншікті тілшісі.

«Бүгін біздің туларымыз испан халқымен ниеттестігіміздің белгісі ретінде жартылай түсіріледі. Сіздермен бірге қайғырып отырмыз. Біз бірге көтерілеміз», - деп жазды ЕК президенті Урсула фон дер Ляйен.

Сонымен қатар, Испания Валенсия мен Альбасетеде құтқару жұмыстары жалғасуда. Пайпорта, Альфафар немесе Утиэль-Рекена – Валенсияда ең қатты зардап шеккен муниципалитеттердің бірі.

Су тасқыны салдарынан 95 адам қаза тауып, ондаған адам із-түзсіз жоғалды.

Бұрын хабарланғандай, Испанияда үш күн аза тұту күні деп жарияланды.

Король Фелипе мен Испания премьер-министрі Педро Санчес қаза болғандардың отбасыларына көңіл айтты. Испания үкіметінің басшысы ауа райының қолайсыздығына байланысты жағдай әлі өзгермегенін ескертті.

Осыған дейін Испанияда су тасқыны салдарынан 50-ден астам адам мерт болғаны туралы жаздық.

Испаниядағы су тасқынынан зардап шеккендер арасында қазақстандықтар жоқ.