Бішкек жылу электр орталығындағы апат: тұрғындарға ыстық су беріле бастады

АСТАНА. KAZINFORM - Бішкекте жылу электр орталығындағы апаттан кейін тұрғындардың көбі ыстық сусыз қалған еді. Билік бүгін кешке дейін барлық тұтынушыларға ыстық су қосылады деп уәде берді, деп хабарлады Кабар агенттігі.

«Электр станциялары» ААҚ – «Бішкектеплосет» филиалының директоры Ұран Райымбеков бүгінде жылу берілмеген бірде-бір үй немесе мекеме жоқ екенін айтты.

Оның айтуынша, кешке дейін барлық тұтынушыларға ыстық су беріледі.

– Қазір қалпына келтіру жұмыстары жүргізіліп жатыр. Көптеген азаматтар ыстық суды өшіргеннен кейін су жылытуға арналған бак қосты. Содан суық судың қысымы ыстық суды итеріп, қиындық пайда болады, - деді ол.

Райымбеков, сондай-ақ, қазіргі уақытта тиісті жұмыстар жүргізіліп жатқанын атап өтті.

«Күннің соңына дейін барлық абоненттер ыстық сумен қамтамасыз етіледі», - деп қорытындылады «Бішкектеплосет» басшысы.

Ол, сондай-ақ, ірі коммерциялық ұйымдарда әлі жылу мен ыстық су жоқ, бірақ мамандар жұмыс істеп жатқанын баса айтты.

Естеріңізге сала кетейік, 2 ақпанға қараған түні Бішкек ЖЭО-да апат болып, қондырғылар істен шыққан болатын.