Будапештегі турнирде Жәмила Бақбергенова чемпион атанды
АСТАНА. KAZINFORM — Мажарстан астанасы Будапешт қаласында өтіп жатқан күрес түрлерінен рейтингілік турнирдің екінші күнінде қазақстандық балуандар бір алтын, екі қола медаль алды.
Бұл жүлделерді әйелдер күресінің шеберлері қоржынға салды.
Рейтингілік турнирде 72 келіде финалда сынға түскен Жәмила Бақбергенова мажарстандық Ноеми Сзабадосты 12:11 есебімен жеңіп, жарыстың жеңімпазы атанды.
Аталған салмақта 3-орын үшін белдесуде Гүлмарал Еркебаева украиналық Ирина Заблоцканы 4:1 есебімен қапы қалдырып кетті.
Ал 59 келіде 3-орын үшін белдесуде Диана Каюмова тағы бір отандасымыз Ирина Кузнецованы 6:4 есебімен осал тұсын тапты.
Айта кетсек, жарыстың алғашқы күні, 6 маусымда ел құрамасынан Әлішер Ерғали (97 келі) алтын, Юсуп Батырмырзаев (125 келі) күміс, Ризабек Айтмұқан (97 келі) қола алған еді.
