Бүгін елдің солтүстігі мен оңтүстік-шығысында жел тұрып, бұрқасын болады - Қазгидромет

АСТАНА. 6 желтоқсан. ҚазАқпарат - «Қазгидрометтің» болжауынша, сейсенбі күні Қазақстанның басым аумағының ауа райына антициклон әсер етеді.

Елдің тек солтүстігі мен оңтүстік-шығысында фронталды бөліктердің ығысуымен күн райы тұрақсыз болады.

Атап айтқанда, Ақмола, Солтүстік Қазақстан және Батыс Қазақстан облыстарының кей аумақтарында 15-20 м/с жылдамдықта жел соғады. Ақмола облысында оған жаяу бұрқасын қосылады.

Күндіз Ақтөбе, Қостанай облыстарының жекелеген жерлерінде 15-20 м/с күшпен жел соғады, жаяу бұрқасын жүреді, тұман түседі.

Алматы, Оңтүстік Қазақстан, Маңғыстау, Атырау, Қарағанды, түнде Қызылорда облыстарында сондай-ақ, тұман күтілуде.

Павлодар, Шығыс Қазақстан облыстарының кей өңірлерінде жаяу бұрқасын болжануда.

Ал Жамбыл облысында тұман мен көктайғақ болады.