Бүгін - теңге күні (ФОТО)

АСТАНА. ҚазАқпарат - 1992 жылдың 27 тамызы күні Ұлттық банк теңге купюрасының үлгілерін бекітті. Ертесіне қазақ валютасын өмірге келтірген суретшілер Тимур Сүлейменов, Меңдібай Алин, Ағымсалы Дүзелханов, Қайролла Әбжәлеловтер Англияға аттанды. 1992 жылы теңге дизайнындағы портреттер бекітілді. 1993 жылдың 12 қарашасы күні Елбасы Нұрсұлтан Назарбаев «Қазақстан Республикасында ұлттық валюта енгізу туралы» Жарлыққа қол қойды. Ал 1993 жылдың 15 қарашасында Тәуелсіз Қазақстан Республикасының төл валютасы айналымға енді.

Сондай-ақ, 1997 жылы Ел Президенті Нұрсұлтан Назарбаевтың Жарлығымен 15 қараша төл валютамыздың туған күні әрі қаржыгерлер күні болып белгіленді. Аталмыш мереке қарсаңында Қазақстан Республикасы төл теңгесінің алғашқы үлгілерін назарларыңызға ұсынамыз.