Бүгін «Тобыл» UEFA Чемпиондар лигасында «Ференцварошпен» қарымта ойын өткізеді

НҰР-СҰЛТАН. ҚазАқпарат – Футболдан UEFA Чемпиондар лигасы бірінші іріктеу сатысындағы қазақстандық «Тобыл» бүгін сырт алаңда Венгрияның «Ференцварош» командасымен кездеседі, деп хабарлайды ҚазАқпарат тілшісі.

Аталған кездесу елорда уақытымен 00:00-де басталып, «Qazsport» телеарнасынан тікелей эфирде көрсетіледі.

Ойын Будапешт қаласындағы 23 700 жанкүйерге арналған «Гроупама Арена» стадионында болады.

Кездесуде польшалық Кшиштоф Якубик бас қазы қызметін атқарса, оған отандастары Бартош Хейниг пен Томаш Немировски көмекшілік жасайды.

Жұп бойынша жеңімпаз атанған команда екінші іріктеу сатысында «Слован» (Словакия) мен «Динамо» Батуми (Грузия) жұбының жеңімпазымен шеберлік байқасады.

Ұтылғаны Конференция лигасы екінші іріктеу сатысында «Шкупи» (Македония) мен «Линкольн Ред Импс» (Гибралтар) жұбындағы жеңілген командамен ойнайды.

Еске салсақ, «Тобыл» UEFA Чемпиондар лигасындағы алғашқы матчында тең түсті.