Бурабайдағы хайуанаттар бағы: қыста жануарларды немен қоректендіру керек
Ақмола облысындағы Бурабай курортының хайуанаттар бағында аң-құстың 30 түрі бар. Тұяқтылар, жыртқыштар, құстар, кеміргіштер... Бұлардың әрқайсысының дербес диетасы бар, соған сай мәзір жасалған, деп хабарлайды Kazinform.
«Сүйкімді жануарларға азық беріп, селфи жасауға бәріміз құмармыз, әрине. Дегенмен, егер біздің жануарлар ауырып қалмасын десеңіз, хайуанаттар бағына келгенде қарапайым азықтандыру ережелерін сақтауыңызды сұраймыз», — дейді «Бурабай-Даму» ЖШС қызметкері Әсем Мұқымова.
Нені есте сақтау керек?
- Шөпқоректілерге нан, сәбіз, қызылша және басқа да көкөністерді қалыңдығы 1 см-ден аспайтындай етіп, дөңгелеп беруге болады.
- Жыртқыштарға жуан сүйектері бар ет бермеңіз.
- Көкөністерді тұтастай жесе, өңеші бітеліп, қақалып қалуы мүмкін.
- Шабдалы, қара өрік, нектарин тәрізді жемістерді кесек-кесегімен жегізбеңіз.
- Азықтандырмас бұрын, азықтың бүлінбегеніне, шірік, көгеру және бөгде заттардың жоқ екеніне көз жеткізіңіз.
- Полиэтилен пакеттер табиғатқа орасан зиян келтіретінін білеміз. Сол үшін ондай қалдықтарды жануарлардың жанында қалдырмаған жөн. Жеп қойып немесе басқа жағдайға ұшыраса, өліп қалуы мүмкін.
Айта кетсек, Президент Іс басқармасы «Бурабай-Даму» кәсіпорнының Хайуанаттар бағы баршаңыз үшін есігін айқара ашты.
Еске салайық, «Бурабай» ұлттық паркінде 470 тонна шөп және 135 мың бума жапырақ дайындалды.
