БҰҰ: Халықаралық тұрақтылық үшін шұғыл әрекет керек

АСТАНА. KAZINFORM — Біріккен Ұлттар Ұйымының Адам құқықтары жөніндегі жоғарғы комиссары Фолькер Тюрк БҰҰ Адам құқықтары жөніндегі кеңесінде сөз сөйлеп, әлемде көптеген қақтығыстар орын алып, бейбіт тұрғындар ауыр зардап шегіп жатқанын және гуманитарлық дағдарыстар күшейіп келе жатқанын атап өтті.

Ол халықаралық қауымдастықты жедел шаралар қабылдауға, бейбіт процестерді ілгерілетуге және жаһандық тәртіптің одан әрі құлдырауына жол бермеуге шақырды.

Тюрктің айтуынша, бірқатар қақтығыс аймақтарында жалғасып жатқан соғыс көптеген адамның өмірін қиып, гуманитарлық көмектің жетуіне кедергі келтіруде және миллиондаған адам босқынға айналған.

Ол әсіресе Судан, Украина, Газа секторы және Конго Демократиялық Республикасындағы шиеленіскен жағдайға алаңдаушылық білдіріп, әлем елдерін қақтығысушы тараптарға қысым жасап, саяси шешімдер қабылдауға ықпал етуге шақырды.

Сонымен қатар, ол технологиялық алпауыт компаниялардың әлемдік саясатқа ықпалы күшейіп келе жатқанын атап өтіп, олардың ақпаратты манипуляциялау арқылы қоғамның еркіндігіне қауіп төндіруі мүмкін екенін ескертті.

Осыған байланысты, Тюрк үкіметтерді технологияларды реттеу шараларын күшейтіп, негізгі құқықтардың бұзылуына жол бермеуге шақырды.

Тюрк адам құқықтарының жаһандық тұрақтылықты қамтамасыз етудегі маңыздылығын атап өтіп, барлық мемлекеттердің өзара ынтымақтастық орнатып, бейбітшілікті қолдап, әлемнің қауіпсіз әрі әділетті болашағын қалыптастыруға күш салуы қажеттігін айтты.