БҰҰ: Израиль блокадасы Газаны «жер бетіндегі ең аш аймаққа» айналдырды
АСТАНА.KAZINFORM - Палестина анклавының әрбір тұрғыны азық-түлік қорының жетіспеушілігінен әбден аштыққа ұшырады, деп хабарлайды Kazinform агенттігінің меншікті тілшісі.
Израиль Газа секторына гуманитарлық көмектің аз ғана бөлігін беруге рұқсат беріп отыр. Бұл туралы жұма күні БҰҰ гуманитарлық істерді үйлестіру басқармасының өкілі Йенс Ларке мәлім етті. Ол анклавты «жердегі ең аштыққа ұшыраған аймақ» деп атады, деп жазды Reuters.
БҰҰ мәліметінше, Газа секторымен шекараға гуманитарлық жүк тиелген 900 жүк көлігінің тек 600-іне ғана Израиль шекарасына жетуге рұқсат етілген. Бірақ одан кейін де, Ларкенің айтуынша, «бюрократиялық процедуралар мен қауіпсіздік шектеулері» Газаның өзіне көмек жеткізуді іс жүзінде мүмкін емес етеді.
- Бар болғаны ұн әкеле алдық. Ал ұн жеуге дайын тағам емес. Оны пісіру керек. Газ, отын немесе тамақ пісіретін жабдық жоқ жағдайда бұл мүмкін емес, - деді Ларке Женевадағы брифингте.
Оның айтуынша, Газа секторы түгелдей аштыққа ұшырау қаупінде тұр.
Халықаралық Қызыл Крест және Қызыл Жарты Ай комитетінің өкілі Томмасо делла Лонга анклавтағы медициналық мекемелердің жартысы жұмыс істемейтінін атап өтті. Оған жанар-жағармай тапшылығы, сондай-ақ өмірлік қажетті құрал-жабдықтар мен дәрі-дәрмектің жетіспеуі себеп.
Халықаралық ұйымдар Израильді Газа секторына гуманитарлық көмектің қауіпсіз және кедергісіз жетуін қамтамасыз етуге шақыруды жалғастырып жатыр. БҰҰ өкілдерінің айтуынша, жердегі жағдай тез нашарлап, ауқымды гуманитарлық апат қаупі барған сайын шындыққа айналып жатыр.
Айта кетейік, жақында ғана анклавта АҚШ-тың қолдауымен Израиль құрған Газа гуманитарлық қорының жаңа тарату орталығы жұмыс істей бастады. Оның мақсаты – гуманитарлық көмектің ХАМАС-тың қолына түсуіне жол бермеу.
Бірақ анклавтағы көмекті тарату механизмі БҰҰ мен халықаралық гуманитарлық ұйымдар тарапынан сынға ұшырап, қолдаудан бас тартты. Бөлудің алғашқы күндері палестиналықтар арасында құрбандар мен жарақат алғандар болды.
Бір күн бұрын Израиль билігі ХАМАС жетекшісінің жойылғаны туралы бұрынғы ақпаратты жария түрде растады.
