БҰҰ Қазақстанға бітімгерлік миссияға жылына 5 млн доллар төлем жасайды
АСТАНА. KAZINFORM – Бүгін Мәжілістің жалпы отырысында «БҰҰ-ның бөлуді бақылау жөніндегі күштеріне (UNDOF) ресурс ұсынатын ҚР Үкіметі мен БҰҰ арасындағы өзара түсіністік туралы меморандумды ратификациялау туралы» заңы мен «2024 жылғы 14 ақпандағы БҰҰ-ның бөлуді бақылау жөніндегі күштеріне (UNDOF) ресурс ұсынатын ҚР Үкіметі мен БҰҰ арасындағы өзара түсіністік туралы меморандумға хаттар алмасу нысанындағы келісімді ратификациялау туралы» заңы қабылданды.
Заң жобасымен Қорғаныс министрінің орынбасары Шайх-Хасан Жазықбаев таныстыра отырып халықаралық шарт 2024 жылғы 19 қаңтардағы «Бірікен Ұлттар Ұйымының миссияларында қатысу үшін Қазақстан Республикасы Қарулы Күштері бітімгершілік контингентін жіберу туралы Қазақстан Республикасының Президенті Қасым-Жомарт Тоқаевтың ұсынысы туралы» Парламент қаулысын іске асыру үшін қол қойылғанын айтты.
- Миссияға қатысу үшін қазақстандық персоналды және мүлікті ұсынудың әкімшілік, логистикалық және қаржылық шарттарды белгілейтін негізгі меморандумға 2024 жылғы 14 ақпанда қол қойылды. Құжат бітімгершілік операцияларға өз күштерін беретін барлық елдер үшін ортақ стандарт. 2024 жылғы наурыздан бері 139 әскери қызметшілер мен 26 әскери техникадан тұратын ұлттық контингент Голан биіктігіндегі бітімгершілік миссияға қатысты. Голан биіктігіндегі миссияның мақсаты Израиль мен Сирия арасындағы татулықты қолдау, сондай-ақ Израиль мен Сирия әскерлерінің бөлінуін бақылау мен қадағалау, - деді Шайх-Хасан Жазықбаев Мәжілістің жалпы отырысында.
Оның айтуынша, БҰҰ Қазақстанның аталған миссияға қатысқаны үшін жылына шамамен 5 млн АҚШ доллар төлем жасайды. Оның ішінде шамамен 2,4 млн АҚШ доллары жеке құрам төлемі, қалған 2,6 млн АҚШ доллары техника, қару-жарақ пен мүлікті жалға алуға бағытталған.
- Әр бітімгер әскери қызметшіге айына 1448 АҚШ доллар болатын мөлшерлеме бекітілген. «Қазақстан Республикасының бітімгершілік қызметі туралы» заңға сәйкес мемлекеттің бітімгершілік операцияға шығынын өтеу тәртібінде БҰҰ бөлінетін қаражат республикалық бюджет кірісіне түседі. БҰҰ-мен қаржылық мәселелерді реттеу мақсатында меморандумға қосымша келісім жасалынды. Жобаны БҰҰ хатшылығымен келісу 9 ай уақыт алды, өткен жылдың соңында қол қойылды, - дейді ол.
Сондай-ақ спикер БҰҰ-дан түсетін төлемді екіге бөлінетінін айтты, яғни бір бөлігі әскери қызметшіге жалақы ретінде төленеді, ал мүлік, техникаға түсетін қаржы мемлекеттік бюджетке түседі.
- Қаралып жатқан халықаралық шарттар халықаралық бейбітшілік пен қауіпсіздікті қамтамасыз етуді көздейді, сондай-ақ Қазақстан Республикасының заңдарынан өзгеше қағидаларды белгілейді, сондықтан олар ратификациялануға жатады. БҰҰ-ның бітімгершілік миссияларына қатысу арқылы халықаралық және өңірлік қауіпсіздікті нығайтуға Қазақстанның қосатын үлесі мемлекетіміздің беделін арттырады, - дейді министрдің орынбасары.
Еске сала кетсек, соңғы 30 жылда БҰҰ Қазақстанда ұлттық, өңірлік және жергілікті деңгейлерде 400-ден астам жобаны іске асырды.
