Бюджет кодексі: Астана әкімдігіне іргесіндегі Қосшыға мектеп салуға рұқсат беріледі

АСТАНА. KAZINFORM — Ұлттық экономика министрінің бірінші орынбасары Азамат Әмрин Сенатта өтіп жатқан дөңгелек үстелде жаңа Бюджет кодексі ірі қалалардың айналысындағы агломерацияларды дамытуға қалай серпін беретінін түсіндірді.

— Бюджеттік кодексте арнайы норма бар. Қазіргі заңнама бойынша Астана қаласы Қосшыдағы қандай да бір жобаны қаржыландыруға ақша жұмсай алмайды. Өйткені ол бөтен облыс, бөтен аудан. Енді Бюджеттік кодекс егер жоба қала агломерациясында іске асатын болса, ондай құқық беріп отыр. Өйткені агломерация ұғымы заңға енгізілген. Оның үстіне Астана қаласы Қосшыда мектеп немесе аурухана салуға мүдделі. Өйткені ол жақта әлеуметтік нысан тапшы болса, халық бәрі бір Астанаға ағылады, — деді ол.

Азамат Әмрин бұл елордадағы көлік тығынын ушықтырмау үшін де қажет норма екенін еске салды.

— Сондықтан Астанаға Қосшының өзінде мектеп немесе аурухана салу тиімді болады. Бюджет кодексінде осындай құрал бар. Агломерация ұғымының аясында бір бюджеттен екінші бюджетке ақша аудара аламыз, — деді вице-министр.

Еске салсақ, 15 наурызда Мемлекет басшысы жаңа Бюджет кодексіне қол қойған еді.