Бюджеттің 55 млрд теңгесін игеруде бұзушылықтарға жол берілген – Үкімет отырысы

АСТАНА. ҚазАқпарат – Биылғы қаңтар-мамыр айларында бюджеттің 383 млрд теңгесіне аудит жүргізілді және 55 млрд теңгеге бұзушылықтар анықталды. Бұл туралы ҚР Қаржы министрі Ерұлан Жамаубаев айтты, деп хабарлайды ҚазАқпарат тілшісі.

«Биылғы 5 айда камералық бақылаумен 6,2 трлн теңгеге 209 мыңнан аса мемлекеттік сатып алу рәсімдері қамтылды. Тексеру қорытындылары бойынша 31 550 рәсімнен бұзушылықтар анықталды, оның ішінде мемлекеттік аудит объектілері бұзушылықтарды жою туралы хабарламалардың 91% орындады», - деді Ерұлан Жамаубаев бүгін Үкімет отырысында.

Министрдің айтуынша, 902 аудиторлық іс-шара өткізілді және бюджет қаражатының шамамен 383 млрд теңгесі аудитпен қамтылды.

«Шамамен 55 млрд теңге сомасында қаржылық бұзушылықтар анықталды. Тауарларды жеткізу, қызметтерді көрсету мен жұмыстарды орындау, бюджетке өтеу және есепке алу бойынша көрсету жолымен 43 млрд теңгеге бұзушылықтар жойылды. Аудит объектілері қызметін жетілдіру және тиімділігін арттыру үшін 936 ұсыным берілді», - деді Қаржы министрі.