Біз Украина дағдарысының бейбіт шешілуін қолдаймыз - Мұхаммед бен Салман

АСТАНА.KAZINFORM - Украина президенті мен Сауд Арабиясының тақ мұрагері арасындағы келіссөзде әскери қақтығысты тоқтатуға бағытталған қадамдар мен шарттар талқыланды, деп хабарлайды Kazinform агенттігінің меншікті тілшісі.

Сауд Арабиясының тақ мұрагері және премьер-министрі Мұхаммед бен Салман бен Абдулазиз дүйсенбі күні өз елінің Украинадағы дағдарысты шешуге және бейбітшілік орнатуға бағытталған барлық халықаралық күш-жігерін қолдауға дайын екенін атап өтті.

Бұл мәлімдеме Джиддада Украина президенті Владимир Зеленскиймен кездесу кезінде айтылды. Сондай-ақ екіжақты қарым-қатынас жайы талқыланды. Зеленский мұрагер ханзада Мұхаммедпен келіссөздер екіжақты қарым-қатынасқа, сондай-ақ басқа серіктестермен ынтымақтастыққа арналғанын айтты. Ол тақ мұрагерінің шынайы бейбітшілікке жол ашуға күш салуын жоғары бағалады.

- Сауд Арабиясы маңызды дипломатиялық платформа ұсынып отыр және біз мұны жоғары бағалаймыз, - деп қосты ол.

Оның айтуынша, тақ мұрагерімен келіссөздер әскери қақтығысты тоқтатуға және тұрақты бейбітшілікті қамтамасыз етуге көмектесетін қадам мен шарттарға қатысты. Зеленский тұтқындарды босату мен балаларды қайтарудың маңыздылығын атап өтті, бұл сенімді нығайту шаралары болуы мүмкін.

- Біз өз тарапымыздан конструктивті диалогқа дайынбыз және қажетті шешім мен қадам туралы талқылап, келісеміз деп үміттенеміз. Үстел үстінде нақты ұсыныстар айтылды. Бастысы – тез әрі тиімді әрекет ету, - деп жазды Зеленский X әлеуметтік желісінде.

Бұған дейін Сауд Арабиясында Украина-Америка келіссөздері өтіп жатқаны хабарланған болатын.