ChatGPT пайдаланушыларға үзіліс жасау туралы ескерту көрсететін болды

АСТАНА. KAZINFORM — OpenAI компаниясы осы аптада GPT-5 моделін шығаратын тұста, ChatGPT-ке психикалық немесе эмоциялық ауытқудың белгілерін жақсырақ тануға көмектесетін жаңартулар енгізуде, деп хабарлайды The Verge.

Бұл мақсатта OpenAI мамандармен және кеңесші топтармен бірлесіп, ChatGPT-тің осындай жағдайлардағы жауаптарын жақсарту бағытында жұмыс істеп жатыр.

Компания GPT-4o моделінің сандырақ немесе эмоционалдық тәуелділік белгілерін әрдайым дұрыс тани алмағанын мойындады.

— Біз жасанды интеллект бұрынғы технологиялармен салыстырғанда әлдеқайда жеке әрі жауапты болып көрінуі мүмкін екенін, әсіресе психикалық немесе эмоциялық күйзеліс жағдайындағы осал адамдар үшін, жақсы түсініп отырмыз, — деп мәлімдеді OpenAI өкілдері.

ChatGPT-ті «дені сау пайдалануға» ынталандыру мақсатында компания ұзақ сөйлесу кезінде үзіліс жасау туралы ескертулерді енгізіп отыр. Мұндай жағдайда ChatGPT «Сіз біраз уақыттан бері сөйлесіп отырсыз — үзіліс жасауға қолайлы сәт болар?» деген хабарлама көрсетеді.

Қолданушыға диалогты жалғастыру немесе аяқтау ұсынылады.

OpenAI мұндай ескертулердің уақыты мен форматын болашақта да жетілдіре беретінін атап өтті. Ұқсас функциялар қазірдің өзінде YouTube, Instagram және TikTok сияқты платформаларда қолданылады.

Айта кетейік, бұған дейін ChatGPT-мен жүргізілген жеке әңгімелердің заңдық тұрғыда қорғалмағаны және сот процестерінде пайдаланылуы мүмкін екені хабарланған.