Чехия павильоны көз тартады

АСТАНА. ҚазАқпарат - ЭКСПО-2017 аумағында Чехия Республикасының Ұлттық күні аталып өтті. Іс-шараға ресми өкілдерден Чехия Парламенті Сенатының төрағасы Милан Штех, Қазақстан Республикасы Парла­менті Сенатының төрағасы Қасым-Жомарт Тоқаев пен «Астана ЭКСПО-2017»ҰК» АҚ басқарма төрағасы Ахметжан Есімов қатысты.

Ресми жиын кезінде Қасым-Жомарт Тоқаев ЭКСПО-2017 көрмесі технологиялық жаңғыруға және халықаралық ынтымақ­тастықтың нығаюына жаңа серпін беретінін тілге тиек етті. Сондай-ақ, көптеген елдердің экономикасы мен ғылыми бағыттағы жаңа салалардың дамуына да үлес қосатынын ескерді. Сенат Төрағасы халықаралық қатысушылар мен шетелдік қонақтарға көрме аяқталған соң, ЭКСПО нысан­дарында жұмыс істейтін жаңа құрылымдар туралы айтып берді.

- ЭКСПО аяқталғаннан кейін, көрме аумағында бірнеше халық­аралық институттар пайда болады. Мысалы, «Астана Халықаралық қаржы орталығы», «Жаңа техноло­гиялар паркі», «БҰҰ аясындағы жасыл технологиялар мен инвести­циялық жобаларды дамыту орта­лығы» осында жұмыс істейтін бола­ды. Қазақстан осы ғасырдың ор­тасына қарай әлемнің дамыған 30 мемлекетінің деңгейіне жетуді көздеп отыр, - деді Қ.Тоқаев.

Өз сөзінде Милан Штех ЭКСПО көрмесіне қатысу Чехия Республикасы үшін маңызды екенін айтты.

- Көрмеге қатысудың бірнеше себеп­тері бар. Біріншісі - көп­жыл­дық достық қарым-қатынас. Қазақстан мен Чехия Орталық Азияда әріптес мемлекеттер. Екіншісі, өнеркәсіптік энергетика мен ақылды энергия болып табылатын мамандандырылған көрме тақы­рыбы. Біз ең үздік энергия деге­німіз, ешқашан сарқылмайтын энергия деп білеміз. Сондықтан Чехия Республикасының ғалым­дары мен зерттеушілері экология­ның неғұрлым таза болуына барлық жағдай жасап жатыр. Сол жетістіктердің бірнешеуін Чехия павильонында көруге болады, - деді Милан Штех.

Мерекелік жиынның ресми бө­лігі аяқталған соң, келушілер Чехия мен Қазақстан павильон­дарын тамашалап қайтты. Ал Ұлттық күн сахнасында Прага кон­сервато­рия­сынан келген акробат­тар мен мың бұралған бишілер ЭКСПО қонақтары үшін өнер көрсетті.

Атап өтейік, Чехия мемле­кетінде жаңартылатын энергия көзін пайдалану көрсеткіші13 %-ды құрайды. Ал ЭКСПО-дағы Чехия павильонның жалпы аумағы 292,5 шаршы метр. Онда жаңа техно­логиялар мен энергия көздерін дамыту саласындағы бірқатар жұмыстар көр­сетілген. Павильонда қалдықтарды өңдеуге арналған жаңа технология үлгісі таныс­тырылуда.

ЭКСПО-2017 көрмесіндегі Чеxия павильонында ұшатын велосипедті көруге болады. Жоба авторларының айтуынша, аталған бастамаға жазушы Жюль Вернның қиялындағы велосипед түрткі болған.

Flying Bike-ты құрастыруға бір жыл кетті. Оның ұзындығы - 3,8 метр, ені - 2,5 метр, ал биіктігі - 1,2 метр. Алты пропеллердің арқасында велосипедті көкке көтеруге мүмкіндік бар. Аппараттың жалпы салмағы - 95 келі. Ол 170 келі болатын жүкті көтеруге қауқарлы. Демек, өз салмағын алып тастаса, 80 келіге дейін салмақты адамды көкке ұшыруға болады. Ведосипедте алты қозғалтқыш бар. Төртеуінің қуаттылығы 10 киловатт болса, тағы екеуі 7 киловатт қуатқа ие.

«Велосипедті тоқпен зарядтауға болады. Сондай-ақ, педальды айналдырып, аккумуляторға энергия жинауға мүмкіндік бар», - дейді чеx павильонында жұмыс істейтін гид.

Аккумулятордың сыйымдылығы - 50 ампер/сағат. Велосипед сағатына 50 шақырыммен ұша алады. Алайда, велосипедтің қазіргі нұсқасы тек 3-5 минут қана ұшуға жарайды.