Чехияда жаңа коалициялық үкімет құру жөніндегі келіссөздер басталды
АСТАНА. KAZINFORM — Чехиядағы парламент сайлауының қорытындысы белгілі болды — онда «Азаматтардың наразылық акциясы» (ANO) партиясы жеңіске жетті, деп хабарлайды Kazinform.
Барлық сайлау округіндегі бюллетеньдер есептелгеннен кейін Андрей Бабиш басқаратын ANO қозғалысы 34,51% дауыс жинады.
Билік басындағы ODS, KDU-ČSL және TOP 09 партияларынан тұратын «SPOLU» коалициясы 23,36% дауыспен екінші орынға ие болды.
«Старостове» партиясы 11,23% дауыс жинап, үшінші орынға шықты.
«Пираттар» мен «Жасылдар» — 8,97%, ал «СДПГ», «Триколора», «Свободне» және PRO партиялары — 7,78% дауысқа ие болды. «Автомобилисты» партиясы 6,77% жинаған.
Чехия парламентінің төменгі палатасы — депутаттар палатасы 200 орыннан тұрады, олардың әрқайсысы 4 жылға сайланады. Осылайша, Андрей Бабиштің ANO партиясы 80 мандат иеленді. Сарапшылардың пікірінше, ол көпшілік коалицияны оңшыл «СДПГ» және «Автомобилисты» партияларымен бірігіп құруы мүмкін.
Бүгін Чехия президенті Петр Павел сайлаудан кейінгі алғашқы консультацияны бастады. Ол депутаттар палатасына өткен партиялар мен қозғалыс жетекшілерімен кездесіп жатыр.
Алғашқылардың бірі болып Андрей Бабиш келді, оны сайлауда табысқа жеткен өзге партиялардың көшбасшылары іледі. Чехиялық ČT телеарнасының хабарлауынша, Петр Павел мен Бабиштің кездесуі таңғы сағат 9 шамасында басталып, жарты сағатқа созылған.
Бабиштен кейін SPOLU коалициясының өкілі Петр Фиала (ODS), сонымен қатар оның серіктестері — Маркета Пекарова Адамова (TOP 09) және Марек Выборный (KDU-ČSL) президентпен кездесті. Жексенбі күнгі кездесулерді СТАН партиясының төрағасы Вит Ракушан қорытындылайды. «Пираттар» партиясынан Зденек Гржиб, СДПГ жетекшісі Томио Окамура және «Автомобилисты» партиясының өкілі Петр Мацинка мемлекет басшысымен дүйсенбі күні жүздеседі.
2017–2021 жылдары Чехия премьер-министрі болған Андрей Бабиш Украинаға көрсетілетін әскери көмекті қысқартуды және Еуропалық Одақтың климат пен көші-қон саясатын сынға алумен танымал.
Сарапшылардың айтуынша, ел ішіндегі оңшыл күштер бюджет пен әлеуметтік саясат саласында реформалар жасауға және кейбір халықаралық міндеттемелерді қайта қарауға бара алады. Бұл, әсіресе, өмір сүру құнының өсуіне алаңдаған сайлаушылардың қысымымен байланысты.
Айта кетсек, Чехия — Қазақстанның Еуропадағы маңызды серіктестерінің бірі. Екі ел арасындағы саяси және экономикалық байланыстар нығайып келеді. Сондай-ақ Чехияда білім алуды таңдаған қазақстандық студенттердің саны жылдан-жылға артып отыр.
