Чемпиондар лигасы: «Ордабасы» «Петрокубтан» жеңіліп қалды

АСТАНА. KAZINFORM - Бүгін қазақстандық «Ордабасы» футболдан Чемпиондар лигасы бірінші іріктеу кезеңінде молдовалық «Петрокуб» клубымен қарымта кездесу өткізеді.

Екі команда арасындағы алғашқы кездесуде командалар 0:0 есебіне қанағат білдірген еді.

Сондықтан жарыстың келесі сатысына шығу үшін әрбір команда жеңіске жетуге бар күшін салатыны анық еді. 

Ойын басталғаннан қос клуб шабуылға көбірек көңіл бөлді. Десе де олар діттеген мақсатына жете алмай жатты. Бірінде қақпашылар шеберлік танытса, ендігі бірінде шабуылшылар қақпаны дәл көздей алған жоқ.

Ойынның 34-минутында молдовалық командадан Теодор Лунгу қазақстандық клубтың қорғаушыларының өрескел қателігін паййдаланып, алыстан тепкен добы қақпа торында тулап жатты.

Осылайша «Ордабасы» қарсыласынан 0:1 есебімен жеңіліп, Чемпиондар лигасынан шығып қалды. 

Айта кетсек, енді 18 шілдеде Еуропа лигасында қостанайлық «Тобыл» өз алаңында Словакияның «Ружомберок», Конференция лигасында «Ақтөбе» сырт алаңда Босния және Герцоговинаның «Сараево» командаларымен қарымта кездесу өткізеді.

Ал елордалық «Астана» жарыс жолын Конференция лигасы екінші іріктеу кезеңінен бастайды.