Чемпиондар лигасы: «Реал Мадрид» «Марсельден» басым түсті

АСТАНА. KAZINFORM — Футболдан UEFA Чемпиондар лигасы негізгі кезеңі бірінші турының алғашқы ойын күні өтті.

Бұл турда испаниялық «Реал Мадрид» өз алаңында Францияның «Марсель» клубымен кездесті. Ойын барысында франциялық клубтан Тимоти Веа 22-минутта есеп ашқан еді. Одан кейін Килиан Мбаппе 29, 81-минутта екі мәрте пенальтиден гол соғып, испаниялық клубқа жеңіс алып келді.

Сондай-ақ Англияның «Арсеналы» сырт алаңда Испанияның «Атлетигін» 2:0, Англияның «Тоттенхэм Хотспуры» Испанияның «Вильярреалын» 1:0, сырт алаңда Бельгияның «Юнионы» Нидерландтың ПСВ клубын 3:1, Әзербайжанның «Карабах» клубы Португалияның «Бенфикасын» 3:2 есебімен жеңді.

Ал «Ювентус» (Италия) мен «Боруссия Дортмунд» (Германия) 4:4 есебіне қанағат білдірді.

Енді 17 қыркүйекте «Олимпиакос» (Грекия) мен «Пафос» (Кипр), «Славия Прага» (Чехия) мен «Буде-Глимт» (Норвегия), «Пари Сен-Жермен» (Франция) мен «Аталанта» (Италия), «Аякс» (Нидерланд) пен «Интер» (Италия), «Ливерпуль» (Англия) мен «Атлетико Мадрид» (Испания), «Бавария» (Германия) мен «Челси» (Англия) ойнайды.

Айта кетсек, аталған турнирдегі «Спортинг» (Португалия) пен «Қайрат» кездесуі 18 қыркүйектен 19-на қараған түні Қазақстан уақытымен сағат 00:00–де басталады.

Алматылық клуб беделді турнирде «Реал Мадрид» (Испания), «Интер» (Италия), «Арсенал» (Англия), «Брюгге» (Бельгия), «Спортинг» (Португалия), «Олимпиакос» (Грекия), «Пафос» (Кипр), «Копенгаген» (Дания) клубтарымен ойнайды.