CҚО-да көктемгі су тасқыны қарсаңында гидропосттарда жоспарлы бақылау басталды
ПЕТРОПАВЛ. KAZINFORM – Солтүстік Қазақстан облысында «Қазгидромет» РМК филиалының гидрологтары 24 ақпаннан 7 наурызға дейін гидропосттар желісінде жоспарлы бақылау жұмысын жүргізеді.
Өңірде барлығы 22 гидрологиялық бекет бар, оның үшеуі биыл 1 ақпаннан бастап ашылған. Бұл бекеттерде нивелирлеу жұмысы жүргізіледі.
Мамандардың айтуынша, гидрологиялық бекетті нивелирлеу су деңгейіне бақылау жүргізілетін су өлшегіш құрылғылардың биіктігін анықтау үшін қажет.
Бұл жұмыс су нысандарының жай-күйі туралы, оның ішінде су тасқыны кезінде де дәлірек мәліметтер алуға мүмкіндік береді.
Сонымен қатар, су тасқыны кезеңінде деректердің жоғары сапасын қамтамасыз ететін гидропост қызметкерлерімен техникалық оқу жүргізіледі.
Естеріңізге салайық, бұған дейін СҚО-дағы Сергеевка су қоймасында су деңгейі былтырғыдан 86 см артып, тасып жатқанын жазған едік.
