Д. Назарбаева Шу алқабында жабайы қарасорадан дәрі-дәрмек шығаратын зауыт салуды ұсынады
АСТАНА. 13 қаңтар. ҚазАқпарат - Есірткі шикізаты болып табылатын қарасораға көзқарасты өзгертетін кез жетті. Бұл үшін Шу алқабында жабайы қарасорадан пайдалы өнім алатын зауыт салу керек.
Бүгін Парламент Мәжілісінде өтіп жатқан Үкімет сағатында депутат Дариға Назарбаева осындай ұсыныс жасады. Еске сала кетейік, депутаттар алдында баяндама жасаған Ішкі істер министрі Қалмұханбет Қасымов елімізде есірткінің шикізат базасы болып табылатын Шу алқабының проблемасын шешу қажеттігін көтерген болатын.
Д. Назарбаева Шу алқабының 140 мыңға тарта гектарынан жыл сайын 5 мың тоннаға жуық марихуана (есірткі затын) әзірлеу ықтималдылығын алға тартты. «Мен біздің қарасораға қатысты көзқарасымызды тұтастай өзгертуді ұсынамын. Қарасора - бұл криминалдық мақсаттарда пайдаланылатын есірткі заты ғана емес, бұл сонымен қатар ауыл шаруашылығының түрлі бағыттағы пайдалы дақылы. Қарасорадан жасалатын препараттар бүгінде әлемде ракпен, ЖИТС дертімен сырқаттанғандарға пайдаланылады. Мәселен, бұлар Израильде, Чехия мен Канадада, Голландияда қолданылып жүр», - дейді депутат. Оның айтуынша, қарасора есте сақтау қабілетіне қатысты ауруларда, альцгеймер науқастарына қолданылады. Сондықтан да, әлемнің бірқатар елдерінде қарасораны арнайы өсіру қолға алынған. Сонымен бірге, депутаттың сөзіне қарағанда, қарасорадан әлемде 25 мыңға тарта өнімдер шығарылады.
«Біздің құқық қорғау органдарымыз қаншама жылдар бойы Шу алқабындағы жабайы қарасорамен күресіп келеді? Осы күреске бюджеттен қыруар қаражат жұмсалды. Бұл тиімді ме? Жыл сайын сол баяғы сауалдар қайталанып жатыр. Ендеше, бүгінгі күні жабайы қарасораны жақсы, пайдалы мақсаттарға, соның ішінде медицина, халық шаруашылығы салаларында пайдаланатын уақыт жетті», - деді Д. Назарбаева.
Осыған орай, депутат Ішкі істер министрінен Шу алқабындағы жабайы қарасора қаптаған жерлерді ірі фармацевтикалық компанияларға беруге қатысты көзқарасын сұрады. «Ондай компаниялар осы алқапта зауыт салып, пайдалы өнімдер шығаратын еді. Әрине, бұл үшін ең алдымен біздің заңнамамызға өзгерістер керек», - деді ол.
Өз кезегінде Ішкі істер министрі Қалмұханбет Қасымов Шу алқабындағы жабайы қарасора мәселесі ел үшін үлкен проблема екенін атап өтті.
«Әрине, 140 мың гектар жерді қоршап тастау мүмкін емес, сондықтан одан таралатын есірткі елдің аумақтарына кетіп жатыр. Ендеше, бұны шешудің екі амалы бар. Оның бірі - алқаптың түбегейлі көзін құрту, екіншісі - оны халықтық шаруашылықта пайдалану. Сондықтан, бұл мәселеге қатысты кез келген ұсынысты қолдаймыз. 2012 жылы Ауыл шаруашылығы министрлігі осыған ұқсас арнайы бағдарлама қабылдаған еді. Алайда, еш жұмыс атқарылмай отыр», - дейді Қ. Қасымов.
