Damubala жобасы: тегін үйірмелер еліміздің барлық өңірінде қолжетімді ме
АЛМАТЫ. KAZINFORM – 2023 жылы іске қосылған «Damubala» бағдарламасы қалай жұмыс істейді, тегін үйірмелерге тіркелу үшін не қажет, қандай өзгерістер енгізілді? Бұл сауалдарға Kazinform агенттігінің тілшісі жауап іздеп көрді.
Damubala қалай жұмыс істейді
DamuBala – 4 пен 17 жас аралығындағы балаларға арналған жан басына шаққанда нормативтік қаржыландыру бағдарламасы бойынша үйірмелерді іздеу және оларға жазылу платформасы. Баланы тіркеу үшін өтінішті растай отырып, порталда ЭЦҚ арқылы тіркелу қажет.Кейін баланының профильін құрып, спорт немесе шығармашылық үйірмелеріне жазуға болады.
Мемлекеттік шығармашылық және спорттық тапсырыстарды жүзеге асыратын платформаны жергілікті әкімдіктер мемлекеттік сатып алу порталы арқылы анықтайды.
Биыл Damubala платформасын Қазақстанның 11 облысы мен 3 мегаполисі таңдаған.Сайттан өңірлердің балалар үйірмелері үшін бөлінген қаражатты да көруге болады. https://damubala.kz/. Ресми сайттан Алматы - Damubala бағдарламасына жеткілікті көлемде ақша бөлген жалғыз өңір екенін көруге болады.
Damubala 2025: Алматыда бағдарламаға өзгерістер енгізілді
2025 жылдан бастап Алматыда «Damubala» бағдарламасының механизміне кейбір өзгерістер енгізілді. Атап айтқанда, мемлекеттік шығармашылық және спорттық тапсырыстарды орналастыру және қаржыландыру функциялары Алматы қаласының аудандық әкімдіктеріне тапсырылды. Әрбір спорт және мәдениет бағыттары бойынша мемлекеттік тапсырыстарды жүзеге асыру үшін Алматы қаласының 8 аудандық әкімдігіне есептік жазбалар құрылды.
ҚР «Мәдениет туралы» және «Дене шынықтыру және спорт туралы» заңдарына сәйкес мемлекеттік спорттық және шығармашылық тапсырыс қызметтерін көрсетуші жеткізушілерді қабылдау жүргізілді. 22 қаңтар мен 4 ақпан аралығында қолданыстағы және жаңа жеткізушілердің өтінімдері қарастырылып, мемлекеттік шығармашылық тапсырысты орналастыру қағидаларына сәйкес бағаланды.
Сонымен қатар, оферта шартына сәйкес, келісімшарттар жыл сайын қайта жасалады. Бұл өзгеріс ваучерлерді әділ бөлуге, үдерістің ашықтығын арттыруға және жеткізушілердің жауапкершілігін күшейтуге бағытталған. Бұрын оферта шарттарында мерзім белгіленбейтін.
Жыл бері Алматыда оферта жаңарту үдерісі жүріп жатыр. Дегенмен, барлық жеткізушілер 2025 жылдың 1-21 қаңтар аралығында көрсеткен қызметтері үшін ақы алады. Бағдарламаға қатысатын балалар сабақтарын жалғастыра береді.
Алматы мәслихаты 2025 жылға арналған шығармашылық үйірмелер мен спорттық секцияларды қаржыландыруға 15,1 млрд теңге бөлді.
– Міндетіне салғырт қараған жеткізушілер тізімнен шығарылады.Алматы қаласының Қоғамдық кеңесімен бірлесіп, қызмет көрсетушілердің жұмысына мониторинг жүргізілді. Нәтижесінде, міндетіне салғырт қараған жеткізушілер туралы барлық мәлімет құқық қорғау органдарына жіберілді. Осылайша, бағдарламаны жүзеге асырудың алғашқы кезеңі ретінде қолданыстағы жеткізушілермен қайта келісім жасау және жаңа өтінімдерді қарастыру шаралары қолға алынды. Әрбір жеткізуші өз инфрақұрылымының үйірме немесе секция түріне қойылатын талаптарға сәйкестігін растауға тиіс, – деп хабарлады әкімдіктен.
Сабақтарға қатысуды бақылау енгізіледі
Ваучерлер жеткізушінің баланың заңды өкілімен келісімшартқа отырғанына қарай 2025 жылдың соңына дейін беріледі. Одан кейін балалардың сабаққа қатысуын нақтылау үшін арнайы жүйеге қосылу қажет. Сондай-ақ, ваучерлер ай сайынғы лимит негізінде, белгілі бір санына қарай үлестіріледі.
Былтыр Алматыда балалардың сабақтарға нақты қатысуын растау үшін биометриялық сәйкестендіру (Face ID) жүйесі енгізілген болатын. Осыған байланысты, 2025 жылы жеткізушілермен келісімшарт жасау кезінде балалардың 100% Face ID жүйесіне қосылуы міндетті шарт болмақ.
Damuala платформасындағы үйірмеге қатысып жүргендердің бірі – алматылық Айтөре Дүйсен. 10 жастағы оқушының қызығушылығы каратэге түскен.
– Аптасына үш рет «каратэ» спорттық секциясына барамын. Мен Шотокан каратэ стилін таңдадым. Маған қатты ұнайды. Үш белбеуім бар. Ақ, сары және қызыл, – дейді ол.
Еске салайық, 2021 жылы балалардың шығармашылық және спорттық үйірмелермен қамтуға арналған «Artsport» деп аталатын жоба басталған болатын. Кейін құзырлы органдар осы бағдарлама аясында жұмыс істеген кәсіпкерлерге қатысты бірнеше қылмыстық істі ашып, олардың мемлекетке айтарлықтай шығын келтіргенін анықтады.
