Данияның пошта қызметі хат тасымалдауды тоқтатады

АСТАНА. KAZINFORM — Данияның мемлекеттік пошта қызметі PostNord 2025 жылдың соңында хат тасымалдауды тоқтатады, деп хабарлайды BBC.

Пошта бұл шешімін датчандықтардың хат жазуды іс жүзінде доғарғанымен түсіндіреді: ғасыр басынан бері жіберілетін хаттар саны 90%-ға қысқарған — 1,4 миллиардтан өткен жылы 110 миллионға дейін азайған. Елдегі бар 1500 пошта жәшігі осы жазда алына бастайды.

Данияда хат жеткізу 1624 жылы басталған. 400 жыл бойы, 2023 жылдың соңына дейін, елде әмбебап пошта қызметі жұмыс істеп келген.

PostNord компаниясы енді назарын сәлемдемелерді жеткізуге аударатынын мәлімдеді, ал биыл немесе өткен жылы сатып алынған пошта маркаларын келесі жылдың ішінде қайтарып беруге болады.

Компания басшысы Ким Педерсеннің айтуынша, датчандықтар цифрлық технологияларды көбірек пайдалана бастаған — тек өткен жылдың өзінде жіберілген хаттар саны 30%-ға азайған. Десе де, шамамен 271 мың адам, көбінесе егде жастағылар, әлі де қағаз хаттарды жөн көреді.

Пошташыларды да ауыр кезең күтіп тұр: PostNord-тың 4600 қызметкерінің шамамен 1500-і жұмысынан айырылады.

Бұған дейін «Қазпошта» алғаш рет әлемнің үздік 50 пошта операторларының қатарына кіргенін хабарлаған едік.