Дәрілік заттарды басқаруда жаңа технологиялар енгізіліп жатыр
АСТАНА. KAZINFORM — Қазақстанда дәрілік қауіпсіздікті арттыру және емдеуді цифрландыру аясында Кардиология және ішкі аурулар ғылыми-зерттеу институтында госпитальдық фармация бөлімшесі ашылды. Жаңа жүйе дәрілерді автоматтандырылған есепке алу, сақтау және тарату арқылы емнің тиімділігі мен қауіпсіздігін күшейтуге бағытталған. Бұл туралы ДСМ-нің баспасөз қызметі мәлім етті.
Ведомствоның мәліметінше, жаңа бөлімшеде емдеудің клиникалық-фармакологиялық бағалауы, терапияның тиімділігі мен қауіпсіздігін мониторингілеу, емдеудің ұтымды таңдалуын қамтамасыз ету және дәрілік заттарды дайындау, сондай-ақ қдәрілік заттарды есепке алу және сақтау қоймасы — бөлімі бойынша жұмыстар жүргізіледі.
Мұнда таблеткалық дәрілік түрлерді автоматты түрде беру және қаптау жүйесі енгізілген. Бұл нақты дозалауды қамтамасыз етіп, адам факторының ықпалын азайтады және дәрі-дәрмекті беру процесін жеделдетеді. Дәрілік заттарды сақтауға арналған жаңа автоматтандырылған кабинет сақтау шарттарын қатаң бақылауға, қалдықтар мен жарамдылық мерзімдерін нақты уақыт режимінде есепке алуға, дәрілік препараттардың сақталуы мен қауіпсіздігін арттыруға, сондай-ақ роботтандырылған жеткізу жүйесін енгізуге мүмкіндік береді.
— Автоматтандырылған шешімдерге көшу дәрілік заттарды басқаруды жаңа деңгейге шығарады. Заманауи әдістеме препараттардың өмірлік цикліне — клиникаға түскен сәттен бастап пациентке берілгенге дейінгі үздіксіз мониторингке негізделеді, бұл адам факторын барынша азайтады, — деді институттык Басқарма төрағасы Рустем Төлеутаев дәрілік заттарды есепке алу мен бақылаудың жаңа технологиялық әдістемесін таныстыру барысында.
Клиникалық фармакология бөлімінің жетекшісі Айгүл Бақтығалиева жаңа технологияларды енгізу IT жүйелерді — 1С бухгалтерияны және DAMUMED жүйесін — біріктіруге, бөлімшелердегі медициналық персоналдың уақытын оңтайландыруға, дәрілік қамтамасыз етудің жылдамдығы мен сапасын арттыруға және логистикалық шығындарды азайтуға мүмкіндік беретінін хабарлады.
Денсаулық сақтау министрлігінде атап өтілгендей, госпитальдық фармация бөлімшесін құру дәрілік заттарды дербестендірілген есепке алуды енгізуге, фармакотерапияның сапасы мен қауіпсіздігін арттыруға, шығындарды оңтайландыруға және емдеу тиімділігін мониторингілеудің бірыңғай жүйесін қалыптастыруға бағытталған.
Айта кетейік, елде МӘМС аясындағы қызмет көрсетушілерге жаңа талаптар енгізіледі.
