Дәрменсіз көршісін өлтірген тұрғын 17 жылға сотталды - БҚО

ОРАЛ. ҚазАқпарат - БҚО қылмыстық істер жөніндегі мамандандырылған ауданаралық сотының үкімімен И.Цымбал ҚР ҚК 99-бабы 2-бөлімі 3, 8-тармақтары (адам өлтіру, яғни адамның дәрменсіз күйде екенін көре тұра, пайдакүнемдік ниетпен және қарақшылықпен қасақана қазаға ұшырату), 192-бабы 2-бөлімі 3-тармағына (қарақшылық, яғни бөтеннің мүлкін жымқыру мақсатында үйіне басып кіріп, адамның өміріне немесе денсаулығына қауіпті күш қолдана отырып, шабуыл жасау) сәйкес айыпты деп танылып, мүлкін тәркілеумен бірге 17 жыл бас бостандығынан айыру жазасын қатаң тәртіптегі түзету колониясында өтеуге сотталды.

БҚО сотының баспасөз қызметінен түскен мәліметке қарағанда, И.Цымбал мас күйінде көршісінің жалғыз тұратынын, өзгенің көмегінсіз жүре алмайтынын және қарсылық көрсете алмайтынын біліп, терезені сындырып, үйіне заңсыз кірген. Ұйықтап жатқан үй иесіне шабуыл жасап, ақша талап еткен. Ақша беруден бас тартқан оны қылғындырып өлтірген. Содан кейін үйдің ішін аралап, жәбірленушіге тиесілі заттарды жымқырған.

Сот үкім шығарған кезде ҚК-нің 58-бабы 4-бөліміне сәйкес қылмыстық құқықбұзушылықтар жиынтығы бойынша жаза тағайындау талабын, алдыңғы баптың бас бостандығынан айыратын санкциясында 15 жылдан 20 жылға дейінгі көзделген жаза мөлшерін, екінші баптың 10 жылға дейін бас бостандығынан айыратын санкциясын, прокурордың ұстанымын, қылмысты жеңілдететін және ауырлататын мән-жайларды ескерді.