ДДҰ басшысы Газға медициналық көмектің кедергісіз жеткізілуін қамтамасыз етуге шақырды

АСТАНА. KAZINFORM — Дүниежүзілік денсаулық сақтау ұйымының (ДДСҰ) бас директоры Тедрос Аданом Гебрейесус Газа секторына тұрақты, үздіксіз және күшейтілген медициналық көмектің жеткізілуі қажет екенін мәлімдеді, деп хабарлайды Анадолы.

Гебрейесус Израиль шабуылына ұшырап, аштыққа тап болған Газа секторындағы жағдайға қатысты X платформасында (бұрынғы Twitter) тиісті мәлімдеме жасады.

Ол 1 тамыздан бастап ДДСҰ Газаға медициналық құрал-жабдық тиелген 24 жүк көлігі жеткізгенін хабарлады. Бұл көліктерде базалық дәрі-дәрмектер мен басқа да қажетті медициналық заттар болған, олар медициналық орталықтар мен ауруханаларға таратылады.

— Біз медициналық көмектің тұрақты, үздіксіз және күшейтілген тасымалын талап етеміз. Бұл — бүкіл Газадағы адамдардың өміріне тікелей әсер етеді, — деді ДДСҰ басшысы.

Израиль енгізген қатаң блокада жағдайында тұрған Газа секторы гуманитарлық апатты бастан өткеруде: аштық жайылып, ауыз су, дәрі-дәрмек, медициналық және гигиеналық құралдар жетіспейді.

Аштықтан көз жұмғандар саны артып келеді, әсіресе балалар арасында.

2023 жылдың 7 қазанынан бері Газада аштық салдарынан 169 адам, соның ішінде 93 бала қаза тапқан.

Жергілікті және халықаралық дереккөздер Израильдің «аштық пен шөлді қару ретінде» қолданып отырғанын мәлімдеуде.