ДДҰ маймыл шешегі жағдайына байланысты шұғыл отырыс өткізбек

АСТАНА. KAZINFORM – Дүниежүзілік денсаулық сақтау ұйымының басшысы Тедрос Гебрейсус Конго Демократиялық Республикасында mpox-тың (маймыл шешегі) халықаралық маңызы бар қоғамдық денсаулық сақтау саласына әсерін талқылау үшін төтенше жағдай комитетін шақырту туралы мәлімдеді. Бұл жайлы Reuters агенттігі хабарлап отыр.

Конго Демократиялық Республикасында маймыл шешегінің (mpox) өршуі экспоненциалды түрде таралуда, 450-ден астам адам қайтыс болып, 27000-нан астам жағдай тіркелді. 2023 жылдың басынан бастап mpox 1100-ден астам адамның өмірін қиды, олардың дені – балалар.

Дүниежүзілік денсаулық сақтау ұйымы хабарлағандай, Бурунди, Кения, Руанда және Угандада маймыл шешегінің тағы 50 жағдайы расталған. Бұрын бұл елдерде аталған дерт тіркелмеген.

Осыған байланысты ДДҰ бас директоры Тедрос Гебрейсус көрші елдерде маймыл шешегінің таралуына және Африкада және одан әрі халықаралық таралу мүмкіндігіне байланысты төтенше жағдайлар комитетін шақыруға шешім қабылдағанын айтты.

11 шілдеде ДДҰ жаңа mpox штамының жаһандық қаупі туралы ескерткен еді. Оңтүстік Африка эпидемиологтарының тұжырымдарына сәйкес, Clade 1B штамы негізінен жыныстық жолмен беріледі. Өлім шамамен 5% құрайды.

ДДҰ жауап беруді кеңейтуді қолдау үшін ДДҰ Төтенше жағдайлар резервтік қорынан 1 миллион доллар бөлді. Қосымша қаражат бөлу жоспарлануда. Бұл туралы Тедрос Гебрейсус журналистермен сөйлескен кезде мәлімдеді.