Депутат Құрылыс кодексі туралы: Қатысы бар екені дәлелденсе, Шарлапаев та отставкаға кету керек

АСТАНА. KAZINFORM – Мәжіліс депутаты Бақытжан Базарбек Өнеркәсіп және құрылыс министрі Қанат Шарлапаевпен арадағы дау туралы пікір білдірді.

«Біз бұл жерде бүркемеленген заң бұзу фактісі туралы айтып отырмыз. Қоғамға халықтың ақшасын босқа жұмсап, желге ұшырмау керектігін көрсетуге тырысып жатырмыз. Одан басқа маңызды қажеттіліктер жетеді. Ал бұл жерде Құрылыс кодексі ретінде ешқандай сын көтермейтін құжат дайындаған. Оған қоса, қылмыстық жауапкершілік туралы айтқан кезде жоғары лауазымды шенеуніктер өз қарамағындағыларды ақтау үшін бәрін жасайды. Бұл істе ұстаным айқын болу керек деп ойлаймын. Біз сыбайлас жемқорлықпен күрес туралы айтқан екенбіз, аяғына дейін баруымыз керек», - деді ол.

Депутат министрдің отставкасы туралы да пікір білдірді.

«Бізге министрдің өзінің отставкасы жеткіліксіз. Жеке мен үшін осы фактіге қатысы бар тұлғалар кінәсі дәлелденсе, қылмыстық жауапкершілік арқалауы керек. Министрдің қатысы бар екені дәлелденсе, ол да отставкаға кетуі керек», - деді Бақытжан Базарбек.