Дэвис кубогінің іріктеу матчына қатысатын Қазақстан құрамасы анықталды

АСТАНА. ҚазАқпарат – Теннистен Қазақстан ерлер құрамасы 4-5 ақпанда сырт алаңда Чилимен Дэвис кубогінің іріктеу матчын өткізеді, деп хабарлайды ҚазАқпарат тілшісі.

Қазақстан теннис федерациясынан мәлім еткендей, Юрий Щукин бастаған бапкерлер штабы құрамаға қатысатын ойыншыларды анықтады.

Ел намысын мына теннисшілер қорғайды: Александр Бублик (ATP рейтингісінде 36-орында), Тимофей Скатов (124, ATP), Михаил Кукушкин (195, ATP), Андрей Голубев (49, ATP жұптық рейтингісі), Александр Недовесов (55, ATP жұптық рейтингісі).

«Қарсыластар хард маусымы кезінде неге топырақ төсенішін таңдады? Өйткені Чили командасының барлық ойыншылары осы топырақ төсенішінде жақсы өнер көрсетеді. Сондықтан бұл олар үшін өте тиімді», деді Ю.Щукин.

Матч Ла-Серена қаласында өтеді. Дэвис кубогінің іріктеу матчтары үш сеттік төрт жекелей және бір жұптық бәсекеден тұрады.

Үздік шыққан 12 команда турнирдің финалдық кезеңіне жолдама алады.

Оларға өткен жылғы кубоктің финалистері Канада мен Аустралия, сондай-ақ wild card (арнайы шақырту) алған Италия мен Испания құрамалары қосылады.

Еске сала кетейік, бұдан бұрын Елена Рыбакинаның Аделаида турнирінің ширек финалына шыға алмағанын жазған болатынбыз.

Фото: Қазақстан теннис федерациясы