Димаш Құдайбергеннің 17 концертіне барған польшалық жанкүйері қазақ тілін үйреніп жүр

АСТАНА. KAZINFORM – Әлемге әйгілі әнші, отандасымыз Димаш Құдайбергеннің концертіне әлемнің түкпір-түкпірінен көрермен келді. Концерт алдында Польша елінен келген бір топ жанкүйерді кездестірдік, солардың бірі Тереза Каколмен тілдескен едік.

концерт
Фото: Дәулет Ізтілеу/Kazinform

Тереза Каколмен бірге 14 жанкүйер Польшадан Димаш Құдайбергеннің концертіне арнайы келіпті, олар елордада үш күн болмақ.

«Димаш Құдайбергеннің әр концерті – оның жанкүйерлері үшін ерекше мереке. Оның концертінде болу – Димаштың әрбір тыңдарманы үшін арман. Оның үстіне жеке концерті туған жері Қазақстанда болып жатыр. Бүгінгі ән кеші ерекше өтеді деп тағатсыздана күтіп отырмыз. Біз Қазақстанға келгенімізге қуаныштымыз», - деді Тереза Какол.

Польшалық Тереза Какол Димаштың 7 жылдан бері жанкүйері, осы уақыт ішінде әйгілі әншінің әр елде болған 17 концертінде болған. Димаш Құдайберген туралы алғаш Қытайда өткен «I Am a Singer» жобасында танып, білген. 

концерт
Фото: Дәулет Ізтілеу/Kazinform

«Димаштың даусы ерекше, жоғары ноталарды еркін меңгереді және вокалдық диапазоны кең. Димашты үздіксіз тыңдауға болады. Польшада Димаштың жанкүйерлер базасы бар, шамамен 15 мың адамнан тұрады», - дейді ол.

Шетелдік мейман еліміздің бірнеше өңірінде болған.

«Қазір Димаштың польшалық жанкүйерлері қазақ тілін үйреніп жүрміз. Біз Димаштың ана тілін еркін түсінгіміз келеді. Варшавада төрт жылдан бері «Димаш» атауымен радио жұмыс істеп тұр. Радиода Димаштың әндерінен басқа да қазақ әндері ойнайды. Сонымен қатар радио тыңдармандарымен қазақ тілін бірге үйренеміз. Радиодағы бағдарламаны мен жүргіземін, бірақ әзірге қазақшам мәз емес, уақыт керек», - дейді ол.

Бұған дейін Димаш Құдайбергеннің жанкүйерлері «Астана Арена» алаңына жиналып жатқанын жазған едік.  Еске салайық, Димаш Құдайберген V дүниежүзілік көшпенділер ойындарының ашылу салтанатында өнер көрсетті.  Сондай-ақ, Ұлттық музейде Димаш Құдайбергеннің шығармашылығына арналған көрме ашылды. 

«Дүние дидарындағы Димаш» көрмесіне қазақ жанының болмысын бейнелейтін, оның қайталанбас үнін қалыптастырған, өміріндегі елеулі оқиғалар туралы хабар беретін құндылықтар, танымал тұлғалар мен көптеген жанкүйердің сыйлығы қойылған.

Соңғы жаңалықтар