№1 балалар үйінің тәрбиеленушілері Алматыда қалатын болды

АСТАНА. KAZINFORM — Қазақстандағы бала құқықтары жөніндегі уәкіл Динара Закиева Алматы қаласындағы №1 балалар үйі тәрбиеленушілерінің көшуіне байланысты жағдайға пікір білдірді.

2025 жылдың 1 наурызында Алматы облысындағы Баганашыл ықшамауданында орналасқан № 1 балалар үйінің тәрбиеленушілері жақын арада Қонаев қаласынан 20 шақырым жерде салынып жатқан жаңа үйге көшетіні белгілі болды.

— Мен қазір Алматы облысында балалар үйінің мәселесі бойынша балалардың облыс әкімімен кездесуіне қатысып отырмын, — деп жазды Динара Закиева әлеуметтік желідегі парақшасында.

Ол балалар үйінің тәрбиеленушілері мен Алматы облысының әкімімен өткен кездесудің қорытындысы бойынша келесі ақпаратпен бөлісті:

Баганашылдағы балалар үйінде тұрып жатқан балалар осы үйде қала береді;
Жаңа ғимарат Нүсіпбаев атындағы интернаттың балаларына беріледі (бұған дейін ол жерде жағдайдың өте нашар екенін және балаларға тиісті жағдай жасалмағанын жазған едім);
Жаңа ғимараттың бір корпусын Кәмелетке толмағандарды бейімдеу орталығына береді, ол жерге облыстың барлық ауданынан келген балалар қабылданады, осылайша оларды қалаға тасудың қажеті болмайды.

Қазақстан Республикасындағы бала құқықтары жөніндегі уәкіл бұл мәселе бойынша толық ақпаратты алдағы уақытта әкімдік жариялайтынын атап өтті.

Айта кетелік Алматы облысының №1 балалар үйінің тәрбиеленушілері ғимараттың Алматыдан Қонаевқа көшірілетініне наразы екені туралы жазған едік.