Дмитрий Попко Мексикадағы турнирдің екінші айналымына өтті

ОРАЛ. KAZINFORM – Қазақстандық теннисші, әлемнің 245-ракеткасы Дмитрий Попко Мерида (Мексика) челленджер жарысын сенімді жеңіспен бастады.

Қазақстандық спортшы алғашқы айналымда дүниежүзілік рейтингіде 254-орында тұрған эквадорлық Андрес Андраденің мысын басты – 6:3, 6:4.

Бір сағат 15 минутқа созылған бәсеке барысында Попко 4 эйспен бірге 10 брейк-пойнттың үшеуін пайдаланды. Андраде 2 эйс, 1 брейкпен (3 брейк-пойнт) шектелді.

Дмитрий Попко ширек финалға шығу үшін әлемнің 302-ракеткасы, боливиялық Хуан Карлос Прадо Анхело немесе рейтингіде 785-сатыдағы канадалық Дэн Мартиннің қай жеңгенімен таласады.

Мерида додасының жүлде қоры 100 мың АҚШ долларына бағаланған. Жарыс жеңімпазы 14,2 мың доллар табыс тауып, 75 рейтингілік ұпайға ие болады.

Қазақстанның екінші, әлемнің 98-ракеткасы Александр Шевченко Майами (АҚШ) мастерс турнирінде іріктеу сайысының финалында рейтингіде 117-орындағы аргентиналық Тьяго Агустин Тирантеге жол берді – 3:6, 3:6. Сөйтіп ол негізгі жарыстан тыс қалды.

Еске сала кетейік, бұдан бұрын Александр Шевченконың Майами мастерс турнирін сәтті бастағанын жазған едік.