Дмитрий Попко Мексикадағы жарыстың ширек финалына жолдама алды

АСТАНА. KAZINFORM — Қазақстандық, әлемнің 245-ракеткасы Дмитрий Попко Морелия (Мексика) челленджер турнирінде екінші кездесуін сәтті өткізді.

Қазақстандық теннисші алдымен әлемнің 180-ракеткасы, Франция өкілі Теренс Атманмен екі сағаттан астам уақытқа созылған тартысты матчта 7:6 (8:6), 6:7 (4:7), 6:3 есебімен жеңіске жетті.

Екінші айналымда Д.Попко кезінде рейтингіде 17-орынға дейін көтерілген қазір әлемнің 145-інші, осы жарыстың 5-ракеткасы, тағы бір франциялық Адриан Маннариноның мысын басты – 6:2, 6:3. 

Бір сағат 11 минутқа созылған бәсеке барысында Попко 3 эйспен бірге 4 брейк-пойнттың үшеуін өз есебіне жазды. Маннарино 2 эйспен шектелді. 

Дмитрий Попко ширек финалда әлемнің 117-інші, доданың 4-ракеткасы, аргентиналық Тьяго Агустин Тирантемен сынға түседі. 

Сондай-ақ Бейбіт Жұқаев осы додада жартылай финалға шығу үшін швейцариялық Марк-Андреа Хюслермен таласады. 

Тиранте Майами мастерс турнирінің іріктеу сатысында тағы бір қазақстандық Александр Шевченконы жеңіп кеткен болатын. 

Еске сала кетейік, бұдан бұрын Бейбіт Жұқаевтың Мексикадағы турнирдің ширек финалына шыққанын жазған болатынбыз.

Сондай-ақ Тимофей Скатов Испаниядағы турнирде төртінші кездесуін жеңіспен түйіндеді.