Діндер лидерлері съезі хатшылығы: жасанды интеллекттің дінге әсері талқыланды

АСТАНА. KAZINFORM – Бүгін елордадағы Әлемдік және дәстүрлі діндер лидерлері Съезі Хатшылығының XXII отырысында Иранның Діндер және мәдениеттер диалогы орталығының басшысы, доктор Әли Акбар Зиаи жасанды интеллектің мүмкіндіктері дін жолындағылар үшін күрделі сынақ болатынын айтты.

«Хатшылық жұмысы өз мақсатына жетіп отырғанына сенімдімін. Осы Хатшылық отырыстарында талқылануы қажет тағы бір мәселе – жасанды интеллект пен оның келешек ұрпаққа әсер ету қырлары және халықтың наным-сенімі мен интеллектуалдық географиясының өзгеруі. Негізінде, жасанды интеллект алдағы 10 жылда орасан зор өзгеріске ұшырайды. Діни қоғамдар да осы технологиялық эволюцияға бейімделуі керек. Сондай-ақ, жасанды интеллект діни құндылықтар, наным-сенімдер сияқты іргелі діни құрылымдарды да өзгертеді. Бұл өзгерістер дәстүрлі дін жолындағылар үшін маңызды сынақ болмақ», - деді Әли Акбар Зиаи.

Оның пайымынша, алдағы сын-қатерге діни қауымдастықтар қарсы тұру үшін жүйелі жоспарлар болуы керек.

«Иран өзінің университеттерінде, ғылыми және зерттеу орталықтарында жасанды интеллект пен нейротеология бойынша табысты зерттеулер жүргізді. Біз бұл жетістіктерді жақын арада жариялаймыз», - деді Иранның Діндер және мәдениеттер диалогы орталығының басшысы.

Бұдан бұрын хабарланғандай, ҚР Сенатының төрағасы Мәулен Әшімбаев жасанды зейінді теріс пиғылда пайдалану діни қақтығыстарға әкелуі мүмкін екенін айтты.