«Doing Business» субұлттық рейтингісі Қазақстанның 8 аймағында енгізіледі

АСТАНА. ҚазАқпарат - Келесі жылы бизнесті жүргізудің «Doing Business» субұлттық рейтингісі Қазақстанның 8 аймағында енгізіледі. Бұл туралы Орталық коммуникациялар қызметінде өткен баспасөз мәслихатында ҚР Ұлттық экономика министрлігі Кәсіпкерлікті дамыту департаментінің директоры Ғалия Жолдыбаева мәлім етті.

«Біз келесі жылдан бастап, жаңа жобаны қолға алмақпыз - ол жаһандық рейтингке қолғабыс болатын «Doing Business» субұлттық рейтингісі. Біз Қазақстанның 8 аймағында, соның ішінде Алматы мен Астана қалаларында төрт индикаторды енгізу бойынша жұмысты бастаймыз», - деді Ғ.Жолдыбаева.

Оның сөзіне қарағанда, жергілікті биліктің бизнесті жақсартуға бағытталған төл реформаларын бағалау жүйесі енгізіледі. Ғалия Жолдыбаеваның ойынша, бұл жаңашылдық Қазақстанның «Doing Business-2017» жаһандық рейтингісіне оң әсер етуі тиіс.