Донор өңірлерден республикалық бюджетке алынатын қаражат қаншаға қысқарады — ҰЭМ жауабы
АСТАНА. KAZINFORM — Ұлттық экономика министрінің бірінші орынбасары Азамат Әмрин Сенатта дөңгелек үстелден кейін өткен баспасөз мәслихатында донор өңірлерден республикалық бюджетке алынатын қаражат қаншаға қысқаратыны туралы пікір білдірді.
— Донор өңірлердің трансферт жүктемесін қаншаға азайтатынымыз әзірге белгісіз. Бұл мәселе енді ғана пысықталып жатыр. Сондықтан әзірге алдын ала есептер жоқ. Сәуір айына қарай түпкілікті ақпаратты береміз. Бұл құқықтық-нормативтік акт болғандықтан, сайтқа жариялаймыз. Сол жерден Астанадан, Алматыдан, Атырау облысынан алынатын трансферттер қаншаға азаятынын нақты есептеуге болады, — деді ол.
Аталған өзгеріс 2026 жылдан бастап күшіне енбек.
— Трансферттер де үш жылдық мерзіммен есептеледі ғой. Сонда 2026, 2027, 2028 жылдардың бюджетінде көрініс табады. Ол жұмысты шашамен биыл мамыр айында бастаймыз. Яғни, сәуір айының аяғына дейін әдістемесін нақтылаймыз да бір ай ішінде қосымша есептер жасап, мамыр айында Астана бойынша да, Алматы бойынша да, Атырау облысы бойынша да трансферттерді қалай алатынымыз айқын болады. Оған дейін алдын ала есеп жоқ, — деді Азмат Әмрин.
Осыған дейін бюджетке донор болып отырған өңірлерден алатын трансферттер көлемі азаятыны мәлім болды.
