Допты хоккей: Финалдық турнирде «Ақжайық» алғашқы жеңісіне қол жеткізді

ОРАЛ. KAZINFORM — Кемерово қаласында допты хоккейден Ресейдің жоғары лига командалары арасында өтіп жатқан финалдық турнирде Оралдың «Ақжайығы» А тобында кезекті кездесуін өткізді.

Николай Шавалдиннің шәкірттері бұл жолы «Строитель» (Сыктывкар) командасымен шеберлік байқасты.

Бірінші таймда «Ақжайықтан» Максим Пахомов есеп ашса, «Строительден» Никита Ситников таразы басын теңестірді. Содан кейін Павел Чебаков оралдықтарды алға шығарды – 2:1.
Екінші таймда команда капитаны Максим Өтебалиев екі, М.Пахомов бір гол соғып, есепті 5:1-ге жеткізді. Бұған Леонид Афанасьев жауап қайырса, оралдық Денис Максименко мергендік танытты. Сосын Н.Ситников 12 метрлік айып добын дәл орындады. Қорытынды есеп – 6:3, «Ақжайықтың» пайдасында.

Осы ойыннан кейін 4 ұпай жинаған оралдықтар өз тобында төртінші орынға көтерілді. 

Еске сала кетейік, бұдан бұрын «Ақжайықтың» тартысты матчта мәскеулік командаға есе жібергенін жазған болатынбыз.