ДОПТЫ ХОККЕЙ: Оралдың «Ақжайығы» өз айдынындағы алғашқы ойында жеңіске жетті

АСТАНА. ҚазАқпарат - 16 желтоқсан - Тәуелсіздік күні Орал қаласында допты хоккейден жаңа маусымның беті ашылып, Ресей чемпионаты жоғары лигасында ойнайтын жергілікті «Ақжайық» Воткинскінің «Знамя-Удмуртия» командасын қабылдады.

Ресей допты хоккей федерациясының сайтынан алынған мәліметке қарағанда, өз айдынындағы алғашқы матчта батысқазақстандықтар 5:2 есебімен басым түсті. Қазақстан ұлттық құрамасына алынып жүрген «Ақжайықтың» көшін бастаушылардың бірі Ескендір Нұғманов бұл кездесуде қарсыластар қақпасына екі доп енгізсе, Павел Чебаков, Арыстан Қазыбаев, Петр Грибанов бір-бір голдың авторы атанды. Оған қоса 65-минутта Е.Нұғманов 12 метрлік айып добын енгізе алмады.

17 желтоқсан күні аталған командалар екінші кездесуін өткізеді. «Ақжайық» екінші топта жеті ойыннан кейін осыншама ұпаймен әзірге соңғы, сегізінші орында келеді.