Допты хоккейден ӘЧ: Қазақстан құрамасы финдерден ұтылып қалды
ОРАЛ. ҚазАқпарат - Швецияның Венерсборг қаласында допты хоккейден өтіп жатқан әлем чемпионатында Қазақстан құрамасы бірінші кездесуін финдермен өткізді, деп хабарлайды ҚазАқпарат тілшісі.
Матч Финляндия құрамасының басымдылығымен өтті.
Бірінші таймда финдер екі доп соқса, ойынның екінші кезеңінде тағы жеті гол енгізді. Қорытынды есеп - 9:0. Фин құрамасынан төрт голдың авторы атанған Эмиль Федоров ерекше көзге түсті.
Осы чемпионаттың алғашқы кездесуінде Швеция құрамасы ресейліктерді 6:4 есебімен жеңді.
Ресейлік маман Сергей Инфалин жаттықтыратын, негізінен Оралдың «Ақжайық» хоккейшілерінен құралған Қазақстан құрамасы 28 қаңтарда Ресеймен, 30-ында Швециямен айдынға шығады.
Дүниежүзілік дода 2ақпан күні мәреге жетеді.
Еске сала кетейік,бұдан бұрын Қазақстан құрамасының әлем біріншілігіндегі алғашқы кездесуін финдермен өткізетінін жазған болатынбыз.
