Допты хоккейден Оралдың «Ақжайығы» соңғы ойынында ірі есеппен жеңіске жетті

ОРАЛ. ҚазАқпарат – Допты хоккейден жоғары лига командалары арасында Ресей чемпионатында Оралдың «Ақжайығы» соңғы ойындарын Первоуральскіде жергілікті «СКА-Свердловск» командасымен өткізді, деп хабарлайды ҚазАқпарат тілшісі.

Кеше өткен алғашқы кездесуде айдын иелері 7:6 есебімен басым түсті.

Бұл ойында «Ақжайықтың» сұрмергені, ресейлік Максим Пахомов хет-триктің авторы атанды. Ресейліктер Артем Лапшин мен Александр Слугин, сондай-ақ Орал допты хоккейінің түлегі Дәурен Оралов бір-бірден көзге түсті.

Бүгінгі матчта Николай Шавалдиннің шәкірттері 10:2 есебімен есе қайырды. Бұл жолы А.Слугин қарсыластың қақпасына 4, М.Пахомов 3, А.Лапшин 2 доп енгізді. Тағы бір гол Болат Мұхиттың еншісінде.

Осылайша, оралдықтар 2022-2023 жылғы маусымда үшінші топта төртінші орынмен қорытындылады.

Еске сала кетейік, бұдан бұрын «Ақжайықтың» көш басындағы командаға жол бергенін жазған болатынбыз.