Дубай турнирінде Юлия Путинцева жарыс жолынан шығып қалды

АСТАНА. KAZINFORM — Қазақстанның екінші, әлемнің 20-ракеткасы Юлия Путинцева Дубай (БАӘ) WTA 1000 турнирінің екінші айналымына өте алмады.

Қазақстандық теннисші алғашқы айналымда әлемнің 33-ракеткасы, 20 жастағы чехиялық Линда Носковамен бетпе-бет келді.

Чехиялық спортшы 6:2, 7:6 (7:5) есебімен жеңіске жетті.

Бір сағат 29 минутқа созылған бәсеке барысында Путинцева 1 эйс жасап, 7 брейк-пойнттың біреуін ғана пайдаланды. Носкова 7 эйс, 3 брейкпен (6 брейк-пойнт) көзге түсті.

Осылайша, Ю.Путинцева соңғы екі ірі жарыста Л.Носковадан екінші рет жеңіліс тапты. 

Қазақстанның бірінші, әлемнің 7-ракеткасы Елена Рыбакина рейтингісі жоғары болғандықтан, жарысты екінші айналымнан бастайды.

Өткен жылы Дубайда италиялық Жасмин Паолини чемпион атанған еді.

Дубай додасы 22 ақпанда мәресіне жетеді.

Тағы бір қазақстандық теннисші Михаил Кукушкин Доха (Қатар) ATP 500 жарысында іріктеу сайыстарының финалында италиялық Люка Нардиден ұтылып қалды – 4:6, 4:6. Сөйтіп ол негізгі турнирден тыс қалды.

Еске сала кетейік, бұдан бұрын Бейбіт Жұқаевтың алғаш рет жұптық сында челленджер турнирінің чемпионы атанғанын жазған болатынбыз.

Еске сала кетейік, бұдан бұрын Дохадан кейін Дубай турнирінде Путинцеваның Носковамен екінші рет кездесетінін жазған болатынбыз.