Джей Лоның Астанадағы концерті қалай өтті
АСТАНА. KAZINFORM – Америкалық поп-жұлдыз Дженнифер Лопес «Астана Арена» стадионында жеке концерт берді.
Әлемдік жұлдыз елорда халқы мен қонақтарын 2 сағатқа жуық өнерімен тәнті етті.
Көрермендердің көзінен энергия мен ұмытылмас әсер байқалды. Жиналған жұрт концерттің соңына дейін әншімен қосыла ән айтып, би биледі.
Концерт барысында байқалған ерекше сәт, Дженнифер Лопес әлсін-әлсін алғыс білдіріп, тыңдармандарын жақсы көретінін жиі айтты.
Тағы бір айта кететін жайт, стадион көрерменге лық толды.
Сондай-ақ әлемдік өнерпаз шоу барысында бірнеше рет сахналық образ ауыстырды.
Кеш соңында жұлдыз жанкүйерлердің қасына барып естелік фотоға түсіп, жылы лебізін білдірді.
Елорда әкімдігінің мәліметінше, Дженнифер Лопестің шоуынан кейін көрермен қауым экологиялық бастама көтерді. Концерт аяқталған соң жұрт трибунадан кетіп қалмай, стадиондағы қоқысты жинап, мәдениет пен жауапкершілік деңгейін көрсетті. Акцияға елорда тұрғындарының сүйікті кейіпкеріне айналған Тазабек те қосылды.
Айта кетейік, «Астана Концерт» компаниясының продюсері Мәлік Хасенов америкалық актриса және әнші Дженнифер Лопестің Астанада өтетін концертінен қанша экономикалық пайда түсетінін айтып берді.
Еске салайық, Астанада Jennifer Lopez концерті кезінде шаттл-маршруттар іске қосылды.
Сондай-ақ Алматыға Дженнифер Лопестің концертін тамашалауға 29 елден көрермен келеді деп күтіледі.
