Эгис Климас: Қазақстан боксшыларын қолдауға дайынбыз

АСТАНА. KAZINFORM —  Танымал кәсіпқой бокс менеджері Эгис Климас Астанада өткен Жәнібек-Анауэль айқасы алдындағы баспасөз конферанциясында болашақта қазақстандық боксшылармен жұмыс істеуге дайын екенін айтты.

Эгис Климас қазақстандықтарға сәлем жолдап, ыстық ықыласпен қарсы алғаны үшін алғыс айтты.

- Баршаңызға қайырлы күн! Әсем Астанаға тағы келгеніме қуаныштымын. Ыстық ықыластарыңыз үшін көп рақмет. Бұл менің қазақстанға бірінші рет келуім емес, елдеріңізде көп болдым, осында таныстарым да көп, - деді ол.

Танымал менеджер бұл күнде қазақстандық танымал боксшылармен жұмыс істеп жатыр.

- Иә, мен көптеген қазақстандық талантты боксшылармен жұмыс істедім. Олардың қатарында Мадияр Әшкеев, Қанат Ислам, Жәнібек Әлімханұлы және Мейірім Нұрсұлтанов бар. Олар – мықты боксшылар. Алдағы уақытта жұмыс атқаруға дайынбыз. Егер басқа да жақсы боксшылар болып жатса, біз оларды қолдаймыз, - деді Эгис.

Еске сала кетсек, Жәнібек Әлімханұлы 5 сәуір күні Астана қаласында кезекті жекпе-жегін өткізіп, чемпиондық белдіктерін қорғайды. Кәсіпқой бокс кеші елордадағы «Барыс арена» спорт кешенінде өтеді.

Осыған дейін хабарлағанымыздай, қазақстандық кәсіпқой боксшы Сұлтан Заурбек (19-0, 13КО) болашақта танымал британиялық Matchroom Boxing промоутерлік компаниясымен келісімшарт жасасуы мүмкін.