Егіс алқаптарында дрондарды кеңінен пайдалану керек – Олжас Бектенов

АСТАНА. KAZINFORM – Премьер-министр Олжас Бектенов Үкімет отырысында ауыл шаруашылығы өнімін шыққан жерінен соңғы тұтынушыға дейін жеткізудің ашық тізбегін құруды тапсырды.

— Цифрландыру мемлекеттік қолдау шараларының ашықтығы мен тиімділігін арттыруға ықпал етуге тиіс. Ауыл шаруашылығы жерлерін есепке алуда ІТ-құралдарды енгізу маңызды.

Цифрландыру алқаптар мен жайылымдық жерлерді ұтымды пайдалануға, егін егу жұмыстарын тиімді жоспарлауға ықпал етуі қажет. Осыған орай, барлық ауыл шаруашылығы алқаптарына ғарыштық мониторингті кеңінен қолданып, дрондарды пайдалану керек, - деді Үкімет басшысы.

Сондай-ақ ол ықтимал қуаңшылықтарды цифрлық технологиялар көмегімен ерте болжау бағытында ізденістерді күшейту керектігін айтты.

— Өнімді шыққан жерінен соңғы тұтынушыға дейін жеткізудің ашық тізбегін құру қажет. Бұл жүйе өндірілген өнімді есепке алуға, оның сапасына кепілдік беруге, биологиялық және ветеринарлық қауіпсіздікті бақылауға бағытталуға тиіс.

Климаттық тәуекелдерді, астықтың түсімін және азық-түлік өнімдерінің нарықтық бағасын болжау үшін цифрлық шешімдер мен жасанды интеллектіні кеңінен қолдану керек. Жасанды интеллектіні қолдана отырып, егінді суару, өсімдіктерді қорғау құралдары мен тыңайтқыштарды қолдану, жем-шөп тұтыну, сондай-ақ ауыл шаруашылығы техникалары паркін басқару процестерін оңтайландыру қажет, - деді Олжас Бектенов.

Сонымен қатар бүгін Энергетика министрлігі көктемгі егіс маусымына дизель бағасын ұсынды.