Екібастұздағы сауда орталығының төбесі опырылуынан 5 адам зардап шеккен

ПАВЛОДАР. KAZINFORM - Оқиғадан соң Екібастұз қалалық ауруханасының қабылдау бөлмесіне 5 адам өз бетінше жүгінген. Олардың үшеуі – бала.

Екібастұзда «Maxi Mall» сауда үйінің ғимарат ішінде аспалы төбе құлап түсуіне байланысты 5 адамның зардап шеккен анықталды. 

Оқиға кезінде «Maxi Mall» сауда орталығында болған 5 адам Екібастұз қалалық ауруханасына өз бетінше жүгінген. Олардың ішінде 2008, 2009 жылдары туған үш бала бар. Зардап шеккендерді ауруханаға жатқызудың қажеті болмады. Дәрігерлер қарап, алған жарақаттарына амбулаториялық ем тағайындалды, - деп хабарлады Павлодар облыстық денсаулық сақтау басқармасынан.

Ал өңірлік төтенше жағдайлар департаменті оқиғаның мән-жайын толық анықтау үшін сауда үйі жабылғанын мәлім етті.

Екібастұздағы Maxi Mall сауда – ойын-сауық орталығы 2007 жылы ашылған. Төрт қабатты, жалпы аумағы 28 мың шаршы метр. Орталықта көптеген дәмхана-мейрамханалар, супермаркеттер, фудкорт, электр техникалар дүкені, кинотеатр, банк филиалы, балалардың ойын алаңдары және т.б. борналасқан. Мұнда айына шамамен 300 мыңнан астам адам келеді.
Сауда орталығында бұған дейін бірнеше оқыс оқиға болған.

2012 жылы ғимаратқа жарылғыш қойылды деген жалған ақпараттан 400 адам эвакуацияланған. 
Ал 2023 жылдың қыркүйек айында ондағы киім дүкендерінің бірінде өрт шығып, 57 шаршы метр аумақты от шалған.

Ғаламтордағы ашық ақпарат көздеріне сүйенсек, Maxi Mall сауда – ойын-сауық орталығы «Business Challenge Ltd» ЖШС-ның иелігінде. Компания басшысы Тимербекова Әсия Тастымбекқызы деп көрсетілген.

Еске сала кетейік, бүгін түстен кейін Екібастұзда «Maxi Mall» сауда орталығының ішінде төбе опырылып түсті. Опырылған жердің аумағы шамамен 150 шаршы метр.