Екібастұз ЖЭО-сында зақымдалған құбырды жөндеу аяқталды

АСТАНА. ҚазАқпарат – Екібастұздағы жылу электр орталығында зақымдалған желілік су құбырын жөндеу аяқталды. Бұл туралы «Екібастұзжылуэнерго» жауапкершілігі шектеулі серіктестігінен мәлім етті, деп хабарлайды ҚазАқпарат тілшісі.

«Сағат 16:30-да зақымдалған құбыр бөлігін жөндеу аяқталды. Толық сумен толтырылған соң қазандықтар іске қосылады. Бұл жұмыстарды сағат 20:00-ге дейін аяқтау жоспарланған. Осылайша, станцияда 6 қазандық қайта жұмыс істей бастайды», - делінген кәсіпорын тартқан хабарламада.

«Екібастұзжылуэнерго» ЖШС мәліметінше, сағат 00:00 шамасында станциядағы жылу беру параметрлері 60/40°С көрсеткішіне жетеді.

Қоса кетсек, бұған дейін Премьер-Министрдің бірінші орынбасары Роман Скляр Екібастұзда қазандықтардың істен шығуы жиілеп кеткенін айтқан болатын.