Экология министрлігі бүркіт саны мен құсбегілік нормаларын қалай реттемекші – министр жауабы
АСТАНА. KAZINFORM – Үкімет отырысынан кейін өткен баспасөз мәслихатында Экология және табиғи ресурстар министрі Ерлан Нысанбаев Қазақстан аумағын тіршілік мекеніне айналдырған бүркіт санын білмейтінін айтты.
— Орнитологтар электр желісінің көп тартылуы мен құсбегіліктің қайта жандануына байланысты жабайы табиғатта бүркіт саны азайып кеткенін айтып жүр? Құсбегілердің бүркітті жабайы табиғатқа қайта босатуын реттейтін нормалар енгізесіздер ме? Елдегі бүркіттердің неше пайызы жабайы табиғатта, неше пайызы құсбегілердің қолында, — деп сұрады журналист.
Министр ведомство мамандарының қолында бұл туралы нақты статистика жоқ екенін айтты. Себебі, бүркіт қызыл кітапқа енбеген.
— Бүркітті жабайы табиғаттан алу, оны қайта босату мәселелері жабайы аңға тиесілі заңда белгіленген нормативтік-құқықтық актілері бар. Ол жағынан ешқандай мәселе жоқ. Бүркіт санын нақты білмеймін. Ресми сандар бізде жоқ. Оны есептеуге қаражат қайда? Бүкіл аңды есептеу үшін қаражат керек. Сондықтан Қызыл кітаптағы, жойылып кету қаупі бар құстарды ғана назарда ұстаймыз. Қалғандары назардан тыс қалып тұр. Сол себептен бүркіт, сұңқар сияқты жыртқыш құстарды бақылауға алатын уақыт келді. Сол үшін болашақта бұл мәселені ғылыми-зерттеу жұмыстары арқылы біліп, соның анық-қанығы бойынша іс-шараларды қарастырамыз, — деді Ерлан Нысанбаев.
Министрдің айтуына қарағанда, бүркіттен гөрі сұңқарлардың мәселесі өткір болып тұр.
— Өздеріңіз сияқты осындай проблема бар екенін естіп жүрміз. Тек бүркіт қана емес, сұңқарлардың азайып кеткені туралы мәліметтер бар. Шамамен бір ай бұрын ғалымдармен осы мәселені талқылағанбыз. Оған әзір қаражат қарастыру керек, мұны зерттеу керек. Әрине, ток жүретін сымдар тек бүркітке ғана емес, қай-қай құстың популяциясына әсер етіп жатыр. Сол себептен ең алдымен ғылыми-зерттеу жұмыстарын ұйымдастыру керек болып тұр. Мысалы, екі жылдай бұрын Ресей ғаламы сұңқар мәселесін көтерді. Дегенмен нақты деректер жоқ. Сондықтан жай айтылған болжамдар негізінде қандай да бір іс-шара қабылдауға болмайды. Ғалымдар сұңқарлар мәселесін зерттеу керек деп отыр. Бүркітке сіз айтқан факторлардың әсері тиіп жатса, сұңқарларға кейбір мемлекеттердің азаматтары қызығушылық танытқан жағдайлар болды. Бірақ қазір ондай қызығушылықтарға қатаң тыйым салынған, заң бар, — деді ведомство басшысы.
Айта кетсек, бүгінгі Үкімет отырысында Премьер-министр Олжас Бектенов Экология және табиғи ресурстар министрлігінің қоқыс полигондарын салу бағдарламасын баяу іске асырып жатқанын айтып, сынады.
