Экономика саласында биылғы Нобель сыйлығы кімге бұйырды

АСТАНА. KAZINFORM – Экономика саласында 2024 жылғы Нобель сыйлығы елдер қалай және неліктен байып, дамитыны, сондай-ақ ілгерілеу мен технология неге кейбір жерлерде ұлттардың гүлденуіне әкеліп, кей елдерде керісінше, неге жоғалатыны туралы еңбектерімен танымал болған Дарон Асемоглу, Джеймс Робинсон және Саймон Джонсонға берілді, деп хабарлайды ВСС. 

«Олар қоғамдық институттардың мемлекеттің өркендеуі үшін қаншалықты маңызды екенін көрсетті. Құқық тәртібі дамымаған, ал билігі халықты қанайтын қоғам дамымайды, жақсы жаққа өзгермейді. Лауреаттардың зерттеулері оның себебін түсінуге көмектеседі», - деп атап өтті Швеция ғылым академиясы.

Экономикалық сыйлық дәстүрлі түрде қазан айының басында өтетін Нобель апталығын аяқтайды.

Экономика – жас ғылым, Альфред Нобельдің өсиетінде ол туралы ештеңе айтылмаған. Ол 1968 жылы Швецияның орталық банкі өзінің 300 жылдығына орай Нобель қорына қомақты қаржы аударғаннан кейін пайда болды.

Сондықтан сыйлық ресми жағынан Нобель сыйлығы емес, бірақ оны рәсім кезінде сол комитет береді. Сыйлыққа шамамен 1 млн доллар көлеміндегі ақша мен арнайы әзірленген алтын медаль кіреді.

Жеңімпазды Швеция ғылым академиясы таңдайды. Ол басқа ғылыми пәндер бойынша үздік жұмыстарды марапаттау кезіндегідей ережелерді сақтайды.