Ел ормандарында қылқан жапырақты ағаштарды кесуге 10 жылға тыйым салынады

АСТАНА. ҚазАқпарат – Алдағы 10 жылда мемлекеттік орман қорындағы қылқан жапырақты ағаштарды кесуге тыйым салынуы мүмкін, деп хабарлайды ҚазАқпарат тілшісі.

«2033 жылғы 31 желтоқсанға дейін мыналарға:

- Қазақстан Республикасының мемлекеттік орман қоры учаскелеріндегі қылқан жапырақтылар екпелерінде басты мақсатта пайдалану үшін кесуге және күтім жасап кесуге;

- іріктемелі санитариялық кесуден және ағаш отын сүрегін (0,5-тен 2 м-ге дейін) және тіректерді қоспағанда, қылқан жапырақты іскерлік сүректі дөңгелек түрде өткізуге тыйым салынсын», - делінген Ашық НҚА порталында жарияланған Экология және табиғи ресурстар министрінің бұйрық жобасында.

Құжат 8 қыркүйекке дейін көпшілік талқылауда болады.

Еске салайық, 10 маусымнан бастап елімізден ағаштың жекеленген түрлерін экспорттауға тыйым салынған болатын.