Елбасы барлық тараптарды Украина айналасындағы ахуалды тездетіп шешуге шақырды
«Экономика әрқашан да бейбітшілікке алып келеді. Егер мемлекет көршілес елдермен сауда-саттықты жүргізіп, үлкен тауар айналымға қол жеткізсе, бұл тұрғыда осы үдерістегі елдер көршісінің жағдайы жақсы болғанын қалайды», - деді Елбасы.
Н.Назарбаев қазіргі кездегі санкцияларды Ресей еңсеруге қауқарлы екенін, РФ үлкен ресурстары бар ауқымды мемлекет екенін, әлем елдері Ресейдің пікірімен есептесу керектігін, сондай-ақ Ресей держава ретінде осы атауға лайықты болуы тиіс екенін атап өтті.
Әлемде болып жатқан проблемаларды шешудегі істерге, барша әлемде бейбітшілікті орнату үрдісіне қатысу маңызды деп тоқталған Мемлекет басшысы: «Бұл тұрғыда Ресейдің рөлі баға жетпес және оны әлем елдері түсінуі керек. Осы дағдарыстан Ресей тезірек шығуға ниетті және мен де оған тілектеспін. Украина да бұл дағдарысты еңсеруі қажет», - деді.
Осы орайда Н. Назарбаев Украина ахуалы жақын арада шешілуі қажет екенін айта келе: «Барлық тараптарды бұл проблеманы шешуде уағдаластыққа келіп, халықтарымыздың игілігі үшін ары қарай жылжуға шақырамын», - деп атап өтті.